काठमाडौं। कांग्रेस संसदीय दलका भिष्मराज आङ्देम्बेले बोलाएको विपक्षी दलहरूको संसदीय दलको बैठक तीनवटा निर्णय गर्दै सम्पन्न भएको छ।

बैठकले सरकारले संसद छलेर अध्यादेश ल्याएको निर्णयको विरोध गर्ने, राष्ट्रपति कहाँ पुगेको अध्यादेश प्रमाणीकरण नगर्न अनुरोध गर्ने र संसद छिटो बोलाउन ध्यानाकर्षण गराउने लगायतका निर्णय गर्दै सम्पन्न भएको हो।

बैठकमा नेकपा एमाले संसदीय दलका नेता रामबहादुर थापा बादल, नेकपाका प्रमुख सचेतक युवराज दुलाल र राप्रपाकी सचेतक सरस्वती लामा लगायतको उपस्थिति थियो। बैठक सिंहदरबारस्थित कांग्रेस संसदीय दलको कार्यालयमा बसेको थियो।