काठमाडौं । विपक्षी तीन दलले सरकारसँग नौबुँदे माग अघि सारेका छन्। बिहीबार (वैशाख १८) सिंहदरबारमा बसेको नेपाली कांग्रेस, नेकपा (एमाले) र नेपाली कम्युनिस्ट पार्टी (नेकपा)को बैठकले सुकुम्वासीलाई सुरक्षित बसोबासको व्यवस्था गरी समस्या समाधान गर्न माग गरेको हो।

बैठकपछि एमाले राष्ट्रियसभा दलका नेता प्रेम दंगाल, कांग्रेस प्रमुख सचेतक वासना थापा र नेकपाका प्रमुख सचेतक युवराज दुलालले संयुक्त रूपमा हस्ताक्षर गरेको विज्ञप्ति सार्वजनिक गरिएको छ।

विज्ञप्तिमा आगामी बजेट तथा नीति तथा कार्यक्रम निर्माणका क्रममा विपक्षी दलका सुझावलाई बेवास्ता गरिएको भन्दै असन्तुष्टि जनाइएको छ। सरकारलाई नीति तथा कार्यक्रममा सबै पक्षका धारणा समेट्न आग्रह पनि गरिएको छ।

त्यसैगरी, सुकुम्वासी तथा अव्यवस्थित बसोबासीको दीर्घकालीन समाधानका लागि स्पष्ट नीति ल्याउनुपर्ने र सुरक्षित आवासको व्यवस्था गर्नुपर्ने माग पनि प्रमुख रूपमा अघि सारिएको छ।

विपक्षी दलहरूले सरकारलाई समावेशी नीति अपनाउँदै जनसरोकारका विषयमा गम्भीर बन्न आग्रह गरेका छन्।