कोलकाता। भारतको उत्तर प्रदेशका भारतीय राष्ट्रिय काङ्ग्रेसका अध्यक्ष अजय राय कार्यक्रममा अचानक बेहोस बनेपछि उहाँलाई मेदान्त अस्पतालमा भर्ना गरिएको छ ।उहाँको अस्पतालको आकस्मिक सेवामा उपचार भइरहेको छ । कार्यक्रमका क्रममा राय एकाएक बेहोस हुनुभएको थियो । अत्याधिक पिडा र दुखाइ महसुस भएपछि उहाँलाई तत्काल मेदान्त अस्पताल भर्ना गरिएको हो ।उहाँको उपचारमा विशेषज्ञसहितको चिकित्सकको टोली खटिरहेको बताइएको छ। जानकारीअनुसार ‘सोडियम’को कमी देखिएको र अन्य परीक्षणहरू भइरहेको छ ।

लखनऊमा काङ्ग्रेसको ‘स्टेट लेभल टिचर्स एन्ड डक्टर्स कन्फ्रेन्स’ नामक कार्यक्रममा सहभागी भइरहँदा उहाँ अचानक विरामी हुनुभएको थियो ।विरामी पर्नु पहिले मजदूर दिवसका अवसरमा गरिएको कार्यक्रमलाई सम्बोधन गर्नुभएका प्रदेश कांग्रेस अध्यक्ष रायले भारतमा प्रधानमन्त्री नरेन्द्र मोदीको नीतिको काङ्ग्रेसले मात्र डटेर विरोध गरिरहेको र यो लडाईँमा काङ्ग्रेसको राजनीतिक फाइदा मात्र नभई समाजको हरेक वर्ग, शिक्षक, चिकित्सक र आम नागरिकको हित जोडिएको खावी गर्नुभएको थियो ।

उहाँले भन्नुभयो, “सामाजिक सञ्जालदेखि तल्लो तहसम्म कांग्रेसका कार्यकर्ताहरु सक्रिय छन् । मजदुरको मिहिनेतको प्रशंसा गर्दै रायले लोकतन्त्र, अधिकार र न्यायको रक्षाका लागि यो लडाइँ अघि बढ्ने छ।”कार्यक्रममा उहाँले आफूहरु मजदुरको अधिकारका लागि उनीहरूसँग मिलेर सङ्घर्ष गरिरहेको र यो सही अर्थमा मजदुर दिवसको अन्तर्य हो भन्दै शुभकामना दिनुभएको थियो ।