काठमाडौं । डब्ल्यूबीसी मुए थाई नेपालको आयोजनामा अन्तर्राष्ट्रिय स्तरको ‘ईएफएस फाइट नाइट ८’ मुए थाई प्रतियोगिता यही मे १६ मा काठमाडौंमा हुने भएको छ। सन् २०२१ अगस्ट २७ मा स्थापना भएको डब्ल्यूबीसी मुएथाई संगठनसँग आबद्ध यस संस्थाले खेलाडी विकास, व्यवस्थित प्रतिस्पर्धा र अन्तर्राष्ट्रिय अवसर विस्तार गर्ने उद्देश्यसहित प्रतियोगिता आयोजना गर्न लागेको हो।

आयोजकका अनुसार प्रतियोगितामा कुल २६ खेल हुनेछन्, जसमा ५२ जना खेलाडी सहभागी हुनेछन्। तीमध्ये ६ वटा व्यावसायिक खेल हुनेछन् भने बाँकी खेलहरू शौकिया तथा अर्धव्यावसायिक नियमअनुसार सञ्चालन गरिनेछन्।

मुख्य प्रतिस्पर्धा ५८ केजी सुपर फेदरवेट तौल समूहमा हुनेछ, जहाँ एरावान मुए थाई फाइट जिमका कामा बहादुर मगराती र जिमखाना परफर्मेन्सका गुरमान घर्ती मगरबीच भिडन्त हुनेछ। यस खेलको विजेताले डब्ल्यूबीसी मुए थाई राष्ट्रिय च्याम्पियनसिप बेल्टसँगै एक लाख रुपैयाँ नगद पुरस्कार प्राप्त गर्नेछन्।

त्यस्तै, सह-मुख्य प्रतिस्पर्धा ४८ केजी लाइट फ्लाइवेट तौल समूहमा हुनेछ, जसमा नेपालकी करिश्मा कार्की र भारतकी पुष्पा आरबीच अन्तर्राष्ट्रिय प्रतिस्पर्धा हुने छ। प्रारम्भिक चरणमा सन्तोष खातुन र एलन ठकाली, फुर्बा शेर्पा र अनुप कटुवाल, सञ्जु लामा र आलिश बोम्जोम तथा मुबिन राई र दावा लामाबीच पनि खेल हुने तय गरिएको छ।

प्रतियोगितामा देशभरका ९ वटा जिमबाट खेलाडीहरूको सहभागिता रहने आयोजकले जनाएको छ, जसले नेपालमा मुए थाई खेलको तीव्र विस्तारलाई झल्काउने विश्वास गरिएको छ। कार्यक्रमलाई बागमती युवा तथा खेलकुद परिषद् र बुढानीलकण्ठ नगरपालिकाको सहयोग रहनेछ। साथै यति एयरलाइन्स र एक्सट्रिम इनर्जी ड्रिङ्क्सले प्रायोजन गरेका छन्।

त्यसैगरी, ९७७ क्लोथिङ ब्रान्ड पहिरन साझेदारका रूपमा रहनेछ भने डिजि होमले कार्यक्रमको प्रत्यक्ष प्रसारण गर्नेछ।