काठमाडौं ।  भारतको पश्चिम बंगालसहित चार राज्य र एक केन्द्र शासित प्रदेशमा हालै सम्पन्न भएको विधानसभा चुनावको मतगणना जारी छ। जारी मतगणना अनुसार पश्चिम बंगालमा सत्तारूढ तृणमूल कांग्रेस (टीएमसी) भन्दा भारतीय जनता पार्टी (बीजेपी) निकै अगाडि देखिएको छ।

ताजा मतपरिणाममा टीएमसीको ८५  सिटमा र बीजेपीको २०२ सिटमा अग्रता छ । २९४ सदस्यीय विधानसभा मा बहुमतका लागि १४८ सिट आवश्यक पर्छ, जसअनुसार प्रारम्भिक रुझानमै बीजेपीले बहुमत प्राप्त गर्ने देखिन्छ।

यदि यो राज्यमा टीएमसी पराजित हुन्छ भने यो परिणाम धेरै हिसाबले ऐतिहासिक हुनेछ। पश्चिम बंगालमा सन् २०११ देखि लगातार टीएमसीको सरकार छ भने ममता बनर्जी पछिल्ला १५ वर्षदेखि मुख्यमन्त्री रहँदै आएकी छन्। ०११ मा उनी ३४ वर्ष लामो वामपन्थी सत्तालाई पराजित गर्दै मुख्यमन्त्री बनेकी थिइन्। 

यदि यस पटकको चुनावमा बीजेपीले जित हासिल गर्यो भने उसले पश्चिम बंगालमा पहिलोपटक सरकार बनाउनेछ। 

अघिल्लो चुनावमा टीएमसीले २१५ सिट र बीजेपीले ७७ सिट जितेको थियो। तर यसपटकका अधिकांश एग्जिट पोलहरूले टीएमसी र बीजेपीबीचको मतान्तर निकै कम हुने अनुमान गरेका थिए।  कुनै एक दलले बहुमत पाए पनि ठूलो अन्तर नहुने बताइएको थियो। तर अहिलेको रुझानमा बीजेपी ठूलो जिततर्फ अघि बढिरहेको देखिन्छ।

पछिल्ला ५० वर्षमा पश्चिम बंगालमा प्रायः एकतर्फी चुनाव हुँदै आएका छन्। चाहे कांग्रेस होस्, लेफ्ट होस् वा टीएमसी- जुन दलले जित्छ, उसले प्रायः ठूलो बहुमतसहित सरकार बनाउँदै आएको इतिहास छ।

चुनावका दुई चरणमा कुल मतदान प्रतिशत ९२.४७% पुगेको छ, जुन भारतको स्वतन्त्रता पछिको पश्चिम बंगालमा अहिलेसम्मकै उच्च मतदान हो। यद्यपि यस राज्यमा परम्परागत रूपमा अन्य राज्यहरूको तुलनामा उच्च मतदान हुँदै आएको छ, तर यसपटक शहरी र ग्रामीण दुवै क्षेत्रमा ९०% भन्दा बढी मतदान हुनु असाधारण मानिएको छ।