काठमाडौं। नियात्राकार निर्मलकुमार आचार्य को नियात्रासंग्रह ‘जहाँ छचल्किए भावना’ एक कार्यक्रमका बीच लोकार्पण गरिएको छ।

पर्वतीय साहित्य समाज नेपालका अध्यक्ष तथा वरिष्ठ नियात्राकार प्रतीक ढकाल, श्रीओम श्रेष्ठ ‘रोदन’ र प्रा.डा. भरतकुमार भट्टराई लगायतले संयुक्त रूपमा कृतिको लोकार्पण गरेका हुन्।

कार्यक्रममा अध्यक्ष ढकालले यात्रा गर्नु विश्वविद्यालय शिक्षाभन्दा पनि बढी ज्ञानवर्द्धक हुने उल्लेख गर्दै आचार्यको कृति पनि त्यही स्तरको ज्ञान दिने खालको रहेको बताए।

त्यसैगरी नियात्राकार ‘रोदन’ले ‘जहाँ छचल्किए भावना’ लाई सफल नियात्रा कृति भन्दै यसले पाठकलाई लेखकसँगै यात्रा गराउने क्षमता राख्ने बताए। प्रा.डा. भट्टराईले कृतिको समीक्षा गर्दै यसलाई सुन्दर र सुललित शैलीमा लेखिएको कृति भएको टिप्पणी गरे।

लेखक निर्मलकुमार आचार्यले आफ्ना शुभेच्छुकहरूको निरन्तर प्रोत्साहनका कारण कृति प्रकाशन गर्न सफल भएको बताउँदै पाठकलाई आफ्ना कमजोरी औँल्याइदिन आग्रह गरे।

लोकार्पित कृति रमिला आचार्य अर्यालले प्रकाशन गरेकी हुन्। यस कृतिमा २८ वटा नियात्रा समेटिएका छन्, जसमा ४ धाम, १२ ज्योतिर्लिङ्ग, कैलास, मानसरोवरसहित नेपाल, भारत र चीनका यात्राका अनुभव, देखाइ, भोगाइ र अध्ययन समेटिएको छ।

आचार्य गोरखापत्र राष्ट्रिय दैनिकका पूर्वप्रधान सम्पादक हुन्। उनले साहित्य क्षेत्रमा निबन्ध, गीत, सहलेखन र सम्पादनमार्फत पनि योगदान दिँदै आएका छन्।