काठमाडौं। संघीय संसदका सांसदहरूको बायोमेट्रिक विवरण संकलन कार्य सुरु गरिएको छ। प्रतिनिधिसभा र राष्ट्रियसभाको बैठकमा उपस्थितिको हाजिरी विद्युतीय माध्यमबाट अभिलेखन गर्ने उद्देश्यसहित यो प्रक्रिया बिहीबारदेखि सुरु गरिएको हो।

संघीय संसद सचिवालयका अनुसार विभिन्न संसदीय समितिमा रहेका सांसदहरूको विवरण चरणबद्ध रूपमा संकलन भइरहेको छ।

यसअघि अन्तर्राष्ट्रिय सम्बन्ध तथा पर्यटन समिति, विकास, आर्थिक मामिला तथा सुशासन समिति र अर्थ समिति, साथै विधायन व्यवस्थापन समितिका सांसदहरूको बायोमेट्रिक विवरण संकलन कार्य पूरा भइसकेको छ।

हाल उद्योग तथा वाणिज्य तथा श्रम तथा उपभोक्ता हित समिति र कानुन, न्याय तथा मानव अधिकार समितिका सांसदहरूको विवरण संकलन कार्य भइरहेको सचिवालयले जनाएको छ।

शुक्रबार कृषि, सहकारी तथा प्राकृतिक स्रोत समिति, संघीयता सवलीकरण तथा राष्ट्रिय सरोकार समिति, पूर्वाधार विकास समिति, सार्वजनिक नीति तथा प्रत्यायोजित विधायन समिति, महिला तथा सामाजिक मामिला समिति र राज्य व्यवस्था तथा सुशासन समितिका सांसदहरूको विवरण संकलन गरिनेछ।

त्यस्तै, वैशाख २८ गते सोमबार सार्वजनिक लेखा समिति र शिक्षा, स्वास्थ्य तथा सूचना प्रविधि समितिका सांसदहरूको बायोमेट्रिक विवरण संकलन गर्ने कार्यक्रम तय गरिएको छ।

संसद सचिवालयका अनुसार यो प्रणाली लागू भएपछि सांसदहरूको उपस्थितिको निगरानी अझ प्रभावकारी र पारदर्शी हुने अपेक्षा गरिएको छ।