काठमाडौं । अष्ट्रेलियाली पुरुष क्रिकेट टोलीले तीन खेलको एकदिवसीय शृङ्खलाका लागि पाकिस्तान भ्रमण गर्ने भएको छ।

पाकिस्तान क्रिकेट बोर्डले बुधबार जानकारी दिँदै अष्ट्रेलिया र पाकिस्तानबीच तीन खेलको एकदिवसीय शृङ्खला हुने जनाएको हो। पहिलो खेल मे ३० मा रावलपिण्डी क्रिकेट रंगशालामा आयोजना हुनेछ।

त्यसपछि दोस्रो खेल जुन २ मा हुनेछ भने तेस्रो तथा अन्तिम खेल जुन ४ मा लाहोरस्थित गद्दाफी रंगशालामा खेलाइनेछ। तीनै खेल स्थानीय समयअनुसार साँझ ४:३० बजे सुरु हुनेछन्।

यो शृङ्खला मार्च-अप्रिल २०२२ पछि अष्ट्रेलियाको पाकिस्तानमा पहिलो एकदिवसीय भ्रमण हुनेछ। यसअघि यसै वर्ष जनवरी-फेब्रुअरीमा अष्ट्रेलियाले पाकिस्तानमा तीन खेलको टी-२० शृङ्खला खेलेको थियो, जसमा पाकिस्तानले लाहोरमा ३-० को एकपक्षीय जित दर्ता गरेको थियो।