काठमाडौं । नेपालमा फिफा विश्वकप २०२६ को प्रत्यक्ष प्रसारणका लागि हिमालय स्पोर्ट्स र डीगो एपले शुल्क निर्धारण गरेका छन् । शुक्रबार काठमाडौंमा आयोजित कार्यक्रममा यसबारे जानकारी दिइएको हो ।

विश्वकपका कुल १०४ खेल हेर्न दर्शकले सब्स्क्रिप्सन लिएर शुल्क तिर्नुपर्नेछ । टेलिभिजनमार्फत हेर्न चाहने दर्शकका लागि हिमालय स्पोर्ट्स च्यानल हेर्न प्रति सेट-टप बक्स ९९९ रुपैयाँ (करसहित) शुल्क तोकिएको छ ।

यसका लागि दर्शकले सम्बन्धित केबल अपरेटर वा टेलिभिजन सेवा प्रदायकमार्फत सेवा सक्रिय गर्नुपर्नेछ ।

मोबाइल एपमार्फत मात्र खेल हेर्न चाहने दर्शकका लागि डीगो एप ले ५४९ रुपैयाँ (करसहित) शुल्क तोकेको छ ।

त्यस्तै डीगो एपले सीमित अवधिका लागि ‘अर्ली बर्ड अफर’ अन्तर्गत ९९९ रुपैयाँको सब्स्क्रिप्सन ७९९ रुपैयाँमै उपलब्ध गराउने जनाएको छ । उक्त सब्स्क्रिप्सनपछि मोबाइल एपसँगै वेबसाइटमार्फत पनि खेल हेर्न सकिनेछ । तर एक पटकमा एकै डिभाइसमा मात्र स्ट्रिम गर्न सकिने व्यवस्था गरिएको छ ।

प्रसारण अधिकार एसप्रो मिडियाले प्राप्त गरेको हो, जसले नेपालमा हिमालय स्पोर्ट्स र डीगो एपलाई आधिकारिक प्रसारण साझेदार बनाएको छ ।