काठमाडौं। साब्री लामुचीले फिफा विश्वकप २०२६ का लागि ट्युनिसियाको २६ सदस्यीय टोली घोषणा गरेका छन्।

‘इगल्स अफ कार्थेज’ नामले परिचित ट्युनिसियाले समूह एफमा जापान, नेदरल्यान्ड्स र स्विडेनसँग प्रतिस्पर्धा गर्नेछ। यसपटकको टोलीमा सन् २०२५ अफ्रिका कप अफ नेसन्स खेलेको टोलीभन्दा केही नयाँ अनुहारलाई समावेश गरिएको छ।

विश्वकप टोलीमा स्थान बनाउने चर्चित खेलाडीमध्ये रानी खेदीरा पनि रहेका छन्। ३२ वर्षीय मिडफिल्डरले गत मार्चमा ट्युनिसियाको प्रतिनिधित्व गर्ने निर्णय गरेका थिए। उनले हाइटी र क्यानडाविरुद्धको मैत्रीपूर्ण खेलमा प्रभावशाली प्रदर्शन गर्दै आफ्नो अनुभव देखाएका थिए।

राष्ट्रिय टोली सम्हालेयता प्रशिक्षक लामुचीले टोलीलाई नयाँ स्वरूप दिने संकेत गर्दै युवा तथा पुनरागमन गरेका खेलाडीमाथि विश्वास देखाएका छन्। टोलीमा खलिल आयारी, राएद चिखाउई, रायान एलौमी र ओमार रेकीकलाई पनि समावेश गरिएको छ।