काठमाडौं। टेक्सास इन्टरनेसनल कलेजको आयोजनामा १८औं इन्डो–नेपाल खुला कराते प्रतियोगिता यही शुक्रबारदेखि सुरु हुने भएको छ ।

नेपाल गोजुकाइ कराते डो संघको प्राविधिक सहयोगमा हुने उक्त प्रतियोगितामा नेपाल र भारतका गरी कुल २७३ खेलाडीले सहभागिता जनाउने भएका छन् । प्रतियोगितामा नेपालबाट २५० र भारतबाट २३ खेलाडी सहभागी हुने आयोजकले जनाएको छ ।

प्रतियोगितामा पुरुष र महिला दुवै विधामा समान ११–११ स्पर्धा रहनेछ । खेलहरू मित्रपार्कस्थित टेक्सास इन्टरनेसनल कलेजको प्राङ्गणमै सञ्चालन गरिने प्रतियोगिता संयोजक तथा गोजुकाइ कराते डो संघका महासचिव इन्द्रबहादुर शाही खड्गेले जानकारी दिए ।

दुई दिनसम्म चल्ने यो प्रतियोगिताले नेपाल–भारतबीचको खेलकुद सम्बन्ध थप सुदृढ गर्ने अपेक्षा गरिएको छ ।