तेहरान । अमेरिका र इरानबीच भएको समझदारीपछि विश्वकै महत्वपूर्ण तेल ढुवानी मार्ग मानिने हर्मुज जलघाँटी पुनः पूर्ण रूपमा सञ्चालनमा आउने संकेत देखिएको छ। अमेरिकी राष्ट्रपति डोनाल्ड ट्रम्पले शुक्रबारसम्म उक्त सामरिक जलमार्ग पूर्ण रूपमा खुला हुने बताएका छन्।

ट्रम्पका अनुसार जहाजहरूले हर्मुज जलघाँटी हुँदै पुनः नियमित आवागमन सुरु गरिसकेका छन् र तेल बोकेका ट्यांकरहरू सुरक्षित रूपमा क्षेत्र पार गरिरहेका छन्। उनले मार्ग खुला राख्न थप ठूलो हस्तक्षेप वा अतिरिक्त सहयोग आवश्यक नपर्ने संकेतसमेत दिएका छन्।

करिब तीन महिनासम्म चलेको तनावपूर्ण द्वन्द्वपछि वासिङ्टन र तेहरानबीच भएको सहमतिलाई अन्तर्राष्ट्रिय समुदायले विश्व अर्थतन्त्रका लागि महत्वपूर्ण उपलब्धिका रूपमा हेरिरहेको छ। फेब्रुअरी अन्त्यतिर इरानमा भएको अमेरिका–इजरायल आक्रमणपछि मध्यपूर्वमा तनाव चुलिँदा ऊर्जा आपूर्ति र विश्व बजारमा अनिश्चितता बढेको थियो।

सम्झौतापछि विश्व वित्तीय बजारमा सकारात्मक प्रभाव देखिन थालेको छ। अमेरिकाको वाल स्ट्रिटस्थित डाउ जोन्स सूचकांक नयाँ उचाइमा पुगेको छ भने अन्तर्राष्ट्रिय बजारमा कच्चा तेलको मूल्य करिब पाँच प्रतिशतले घटेको छ। यसले आगामी दिनमा ऊर्जा आपूर्ति सहज हुने र विश्व अर्थतन्त्रमा स्थायित्व फर्किने अपेक्षा बढाएको विश्लेषकहरूको भनाइ छ।