गण्डकी। गण्डकी प्रदेशसभाको आजको बैठकमा आगामी आर्थिक वर्ष २०८३र८४ को बजेटमा आर्थिक मामिला, स्वास्थ्य मन्त्रालय, मुख्यमन्त्री तथा मन्त्रिपरिषद्को कार्यालय, प्रदेश लोकसेवा आयोग, प्रदेशसभा सचिवालयलगायत विभिन्न प्रतिष्ठान एवं निकायसँग सम्बन्धित विनियोजन शीर्षकमा छलफल भएको छ ।

छलफलका क्रममा प्रदेशसभा सदस्यहरूले बजेट निमार्णमा भएका कमीकमजोरी सच्याउँदै बजेटको प्रभावकारी कार्यान्वयन गर्नुपर्नेमा जोड दिए । उनीहरूले बजेट विनियोजनका सबल र सुधार गर्नुपर्ने पक्षबारे आफ्ना धारणा राखेका थिए ।

प्रदेशसभा सदस्य कुसुम बुढा पुन, चम्पादेवी खड्का, फणिन्द्र देवकोटा, रोशनबहादुर गाहा थापा, प्रकाश बराललगायतले विनियोजन विधेयकमाथिको छलफलमा भाग लिनुभएको थियो । बैठकको विशेष समयमा विपक्षी दलका नेता हरिबहादुर चुमान र राष्ट्रिय प्रजातन्त्र पार्टी संसदीय दलका नेता पंचराम गुरुङले बजेटसहित समसामयिक विषयवस्तुमा आफ्ना भनाइ राखेका थिए ।

नेता चुमानले सङ्घीय संरचनालाई थप सुदृढ बनाउनुपर्ने बताउनुभयो । नेता गुरुङले बजेट निर्माणमा मन्त्रीहरूबाट समन्वय नभएको बताए। टुक्रे र वितरणमुखी बजेटले अपेक्षित उपलब्धि हासिल नहुने उनको भनाइ छ ।

विनियोजन विधेयकअन्तर्गत मन्त्रालयत शीर्षकमाथिको छलफल मङ्गलबारदेखि सुरु भएको थियो । बैठकको शून्य समयमा प्रदेशसभा सदस्य चम्पादेवी खड्का, फणिन्द्र देवकोटा र श्यामराजा महतले समसामयिक विषयमा धारणा राखेका थिए ।

आर्थिक मामिलामन्त्री जितबहादुर शेरचनले गत शुक्रबार प्रदेशसभामा प्रस्तुत गरेको आगामी आवको सेवा र कार्यका लागि प्रदेश सञ्चित कोषबाट रकम विनियोजन र खर्च गर्ने सम्बन्धमा व्यवस्था गर्न बनेको विधेयकमाथिको सामान्य छलफल सकिएपछि मन्त्रालयगत विनियोजन शीर्षकमा छलफल सुरु भएको हो ।

गण्डकी प्रदेश सरकारले यही असार १ गते रु ३२ अर्ब ९९ करोड ९९ लाखको बजेट सार्वजनिक गरेको थियो । विनियोजन विधेयकमाथि प्रदेशसभामा छलफल जारी छ ।