एजेन्सी। मध्यपूर्व क्षेत्रमा युद्धविरामको सहमतिपछि अन्तर्राष्ट्रिय बजारमा कच्चा तेलको मूल्य घट्न थालेसँगै श्रीलंकाले पनि पेट्रोलियम पदार्थको मूल्य घटाएको छ।

आयातित इन्धनमा पूर्ण रूपमा निर्भर रहेको श्रीलंकाले मंगलबारदेखि लागू हुने गरी पेट्रोल र डिजेलको मूल्यमा करिब ६ प्रतिशतसम्म कटौती गरेको हो।

श्रीलंका पेट्रोलियम कर्पोरेसनका अनुसार प्रतिलिटर डिजेलको मूल्य २५ श्रीलंकाली रुपैयाँ घटाएर ३८२ रुपैयाँ कायम गरिएको छ भने पेट्रोलको मूल्य प्रतिलिटर २० रुपैयाँ घटाएर ४१४ रुपैयाँ निर्धारण गरिएको छ।

केही महिनायता बढ्दो ऊर्जा लागतका कारण मूल्यवृद्धिको मार खेपिरहेका उपभोक्ताका लागि यो राहतस्वरूप आएको निर्णय मानिएको छ।

यो निर्णय अमेरिका र इरानबीच जारी द्वन्द्व अन्त्य गर्न वार्ता अघि बढाउने सहमति भएपछि अन्तर्राष्ट्रिय ऊर्जा बजारमा आएको सकारात्मक प्रभावसँग जोडिएको छ। युद्धको जोखिम कम हुने संकेतसँगै विश्व बजारमा कच्चा तेलको मूल्य उल्लेखनीय रूपमा घटेपछि त्यसको प्रत्यक्ष प्रभाव इन्धन आयात गर्ने मुलुकहरूमा देखिन थालेको हो।

यसअघि फेब्रुअरीको अन्त्यतिर अमेरिका र इजरायलले इरानमाथि सैन्य आक्रमण गरेपछि विश्व बजारमा कच्चा तेलको मूल्य तीव्र रूपमा उकालो लागेको थियो। त्यसको असर श्रीलंकामा पनि परेको थियो, जहाँ सरकारले पेट्रोल र डिजेलको मूल्य करिब ५० प्रतिशतसम्म बढाएको थियो। बढ्दो आयात लागत व्यवस्थापन गर्न सरकारले विद्युत् महसुलसमेत करिब एक तिहाइले वृद्धि गरेको थियो।

श्रीलंकाले आफ्ना सबै पेट्रोलियम पदार्थ विदेशबाट आयात गर्छ। विद्युत् उत्पादनका लागि आवश्यक कोइलासमेत आयात गर्नुपर्ने भएकाले मध्यपूर्वमा उत्पन्न हुने कुनै पनि भू-राजनीतिक तनावले त्यहाँको ऊर्जा आपूर्ति र अर्थतन्त्रमा प्रत्यक्ष असर पार्ने गरेको छ।

हालैको युद्धविराम र त्यसपछि आएको मूल्य गिरावटले भने श्रीलंकाको ऊर्जा लागत केही सहज बनाउने अपेक्षा गरिएको छ।