काठमाडौं। राहदानी खरिद प्रकरणसँग जोडिएका विषयमा सार्वजनिक भएका केही समाचारप्रति जर्मनीले आधिकारिक स्पष्टीकरण दिएको छ।

काठमाडौंस्थित जर्मन दूतावासले बुधबार सूचना जारी गर्दै उक्त प्रकरणका सम्भावित परिणाम वा कारबाहीबारे नेपाललाई कुनै चेतावनी नदिएको स्पष्ट पारेको हो।

दूतावासका अनुसार राहदानी खरिद प्रकरणबारे सार्वजनिक भएका केही तथ्य गलत वा भ्रामक छन्। त्यसैले वास्तविक अवस्था स्पष्ट पार्न तीन बुँदे जानकारी सार्वजनिक गरिएको जनाएको छ।

स्पष्टीकरणमा बर्लिनस्थित नेपाली कार्यवाहक राजदूतलाई जर्मन संघीय विदेश मन्त्रालयमा छलफलका लागि आमन्त्रण गरिएको उल्लेख छ। दूतावासले यो कूटनीतिक छलफलका लागि गरिएको निमन्त्रणा भएको र स्पष्टीकरण माग्न बोलाइएको भन्ने दाबी सही नभएको जनाएको छ।

जर्मनीले कूटनीतिक अभ्यासमा ‘छलफलका लागि आमन्त्रण’ र ‘स्पष्टीकरण माग्दै बोलाउनु’ दुई फरक प्रक्रिया भएको उल्लेख गर्दै ती विषयलाई एकै रूपमा प्रस्तुत गर्नु तथ्यगत रूपमा गलत हुने जनाएको छ।