काठमाडौं। अमेरिकी राष्ट्रपति डोनाल्ड ट्रम्पले क्रिप्टोकरेन्सी कारोबारबाट एक वर्षमै करिब एक अर्ब अमेरिकी डलर आम्दानी गरेको विवरण सार्वजनिक गरेका छन्।

अनिवार्य रूपमा सार्वजनिक गर्नुपर्ने आर्थिक विवरणमा उनले सन् २०२५ को आम्दानीसम्बन्धी जानकारी दिएका हुन्।

ट्रम्पले ९२७ पृष्ठ लामो आर्थिक प्रतिवेदनमा आफ्नो सम्पत्ति, व्यवसाय र विभिन्न स्रोतबाट भएको आम्दानी उल्लेख गरेका छन्। त्यसअनुसार सबैभन्दा ठूलो आम्दानी क्रिप्टोकरेन्सी कारोबारबाट भएको देखिएको छ।

ह्वाइट हाउसकी प्रेस सचिव एन्ना केलीले ट्रम्पको क्रिप्टो नीतिको प्रशंसा गर्दै अमेरिकालाई विश्वको ‘क्रिप्टो राजधानी’ बनाउने दिशामा उनले नेतृत्व गरेको बताएकी छन्। ट्रम्प वा उनका परिवारका सदस्यले कुनै पनि निर्णयमा स्वार्थ बाझिने अवस्था सिर्जना नगरेको उनको दाबी छ।

प्रतिवेदनअनुसार ट्रम्पले आफ्नै नाममा बिक्री हुने बाइबल, घडी, अत्तर र गितारबाट प्राप्त रोयल्टीमार्फत करिब ४७ लाख अमेरिकी डलर आम्दानी गरेका छन्।

त्यस्तै, फ्लोरिडास्थित उनको ‘मार–ए–लागो’ रिसोर्टबाट ७ करोड ७० लाख अमेरिकी डलर र त्यही राज्यमा रहेको गल्फ कोर्सबाट १२ करोड २० लाख अमेरिकी डलर आम्दानी भएको उल्लेख छ।

यता, प्रथम महिला मेलानिया ट्रम्पले पनि गत वर्ष करिब १ करोड ७ लाख अमेरिकी डलर आम्दानी गरेकी छन्।

उनको जीवनमा आधारित वृत्तचित्रको लाइसेन्स उपलब्ध गराएबापत उक्त रकम प्राप्त भएको प्रतिवेदनमा उल्लेख गरिएको छ।