काठमाडौं । प्रधानमन्त्री वालेन्द्र शाह नेतृत्वको सरकारले आफ्नो कार्यकालको पहिलो १०० दिनका प्रमुख उपलब्धिहरू सार्वजनिक गरेको छ।

सिंहदरबारस्थित प्रधानमन्त्री तथा मन्त्रिपरिषद्को कार्यालयमा आयोजित पत्रकार सम्मेलनमा सरकारका प्रवक्ता सस्मित पोखरेलले सरकारका उपलब्धिबारे जानकारी दिएका हुन्।

प्रवक्ता पोखरेलका अनुसार सरकारको पहिलो उपलब्धिका रूपमा सङ्घीय मन्त्रालयको सङ्ख्या घटाएर १८ मा सीमित गरिएको छ। राष्ट्रिय स्वतन्त्र पार्टी (रास्वपा)को चुनावी प्रतिबद्धताअनुसार मन्त्रालयको सङ्ख्या कटौती गरिएको उनले बताए।

मन्त्रालयको सङ्ख्या घटाइएपछि प्रशासनिक खर्चमा कमी आउने र राज्य कोषमा वार्षिक करिब २० अर्ब रुपैयाँ बचत हुने सरकारको अनुमान रहेको उनले जानकारी दिए।

त्यसैगरी विभिन्न सरकारी संरचनाको खारेजी तथा समायोजनमार्फत खर्च कटौती गर्दै कार्यक्षमता अभिवृद्धि गर्ने नीति अवलम्बन गरिएको प्रवक्ता पोखरेलले बताए। राजनीतिक दल निकट ट्रेड युनियन र विद्यार्थी सङ्गठन खारेजीलगायतका सुधारात्मक निर्णयले सार्वजनिक प्रशासनमा सकारात्मक सन्देश गएको उनको भनाइ छ।