काठमाडौं । सरकारले काठमाडौं उपत्यकाका विभिन्न सुकुम्बासी बस्तीबाट विस्थापित भएका ४६५ परिवारलाई राहत रकम उपलब्ध गराएको जनाएको छ।

सरकारको पहिलो १०० दिनका उपलब्धि सार्वजनिक गर्ने क्रममा शनिबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा आयोजित पत्रकार सम्मेलनमा सरकारका प्रवक्ता सस्मित पोखरेलले उक्त जानकारी दिएका हुन्।

प्रवक्ता पोखरेलका अनुसार मन्त्रिपरिषद्को गत जेठ ५ गतेको निर्णयअनुसार विस्थापनबाट प्रभावित प्रत्येक परिवारलाई २५ हजार रुपैयाँका दरले राहत वितरण गरिएको हो। विस्थापित परिवारलाई तत्काल आर्थिक सहयोग पुर्‍याउने उद्देश्यले राहत उपलब्ध गराइएको उनले बताए।

सरकारले राहत वितरणसँगै प्रभावित परिवारको दीर्घकालीन व्यवस्थापन र समस्या समाधानका लागि आवश्यक थप पहलसमेत अघि बढाइएको जनाएको छ।