काठमाडौं । प्रधानमन्त्री वालेन्द्र शाह नेतृत्वको सरकारले स्वास्थ्य सेवा विस्तारअन्तर्गत देशभरका १४ वटा संघीय अस्पतालमा जलन उपचार (बर्न युनिट) स्थापना गरेको जनाएको छ।

सरकारको पहिलो १०० दिनका उपलब्धि सार्वजनिक गर्दै शनिबार आयोजित पत्रकार सम्मेलनमा सरकारका प्रवक्ता सस्मित पोखरेलले नयाँ स्थापना भएका जलन उपचार इकाइलाई प्रभावकारी रूपमा सञ्चालन गर्न ६४ जना स्वास्थ्यकर्मीलाई विशेषज्ञ तालिम प्रदान गरिएको जानकारी दिए।

प्रवक्ता पोखरेलका अनुसार स्वास्थ्य सेवामा नागरिकको पहुँच विस्तार गर्ने उद्देश्यले सरकारले ‘लक्षित वर्ग निःशुल्क उपचार पोर्टल सञ्चालन तथा व्यवस्थापन कार्यविधि, २०८३’ समेत जारी गरेको छ। यसबाट लक्षित समुदायलाई निःशुल्क उपचार सेवा थप व्यवस्थित र सहज हुने सरकारको विश्वास छ।

त्यसैगरी, औषधि सेवालाई सर्वसुलभ र व्यवस्थित बनाउन ‘सुलभ फार्मेसी सेवा मापदण्ड, २०८३’ लागू गरिएको सरकारले जनाएको छ। उक्त मापदण्डमार्फत नागरिकलाई गुणस्तरीय औषधि सेवा सहज रूपमा उपलब्ध गराउने लक्ष्य राखिएको सरकारको प्रगति विवरणमा उल्लेख छ।