काठमाडौं। सशस्त्र प्रहरी बल (एपीएफ) को कल्याणकारी कोषअन्तर्गत सञ्चालित एपीएफ स्कुलमा भएको भनिएको आर्थिक अनियमितता प्रकरणमा प्रहरीले दुई जनालाई पक्राउ गरेको छ।

प्रहरीको केन्द्रीय अनुसन्धान ब्युरो (सिआईबी) ले एपीएफ स्कुलकी लेखा अधिकृत तथा सशस्त्र प्रहरी निरीक्षक कल्पना गुरुङ र लीलाबहादुर लामालाई शनिबार पक्राउ गरेको हो।

सिआईबी स्रोतका अनुसार सशस्त्र प्रहरीका डीआईजी युवराज अर्यालको संयोजकत्वमा गठित छानबिन समितिको सिफारिसका आधारमा उनीहरूलाई नियन्त्रणमा लिइएको हो। प्रारम्भिक अनुसन्धानमा लामा र गुरुङबीच व्यक्तिगत सम्बन्ध रहेको खुलेको अनुसन्धानमा संलग्न अधिकारीहरूले बताएका छन्।

अनुसन्धानका क्रममा एपीएफ स्कुलबाट कल्याणकारी कोषमा जम्मा हुनुपर्ने रकम अनियमित रूपमा अन्य खातामा सारिएको आशंकामाथि छानबिन भइरहेको प्रहरीले जनाएको छ।

प्रारम्भिक विवरणअनुसार निरीक्षक गुरुङ विगत करिब छ वर्षदेखि एपीएफ स्कुलमा लेखा अधिकृतका रूपमा कार्यरत थिइन्। सशस्त्र प्रहरीको आन्तरिक कार्यविधिअनुसार एउटै आर्थिक जिम्मेवारीमा लामो समय निरन्तर कार्यरत रहन नपाइने व्यवस्था रहे पनि उनी त्यही जिम्मेवारीमा रहेको बताइएको छ।

सशस्त्र प्रहरीको आन्तरिक छानबिनका क्रममा २०८२ माघ र फागुन महिनाको हिसाब मिलान गर्ने क्रममा करिब ७ करोड रुपैयाँ बराबरको रकमको विवरण स्पष्ट नभेटिएपछि अनुसन्धान अघि बढाइएको थियो।

अनुसन्धानमा एपीएफ स्कुलले केन्द्रीय कल्याणकारी कोषमा बुझाउनुपर्ने रकम लीलाबहादुर लामाको बैंक खातामा जम्मा गरिएको र उक्त रकम विभिन्न आर्थिक कारोबारमा प्रयोग भएको आशंका गरिएको स्रोतले जनाएको छ। यद्यपि, यसबारे अनुसन्धान जारी रहेकाले प्रहरीले औपचारिक निष्कर्ष सार्वजनिक गरिसकेको छैन।

यसै प्रकरणमा केन्द्रीय कल्याणकारी कोषमा कार्यरत डीएसपी महेन्द्र हमालको भूमिकामाथि पनि आन्तरिक अनुसन्धान केन्द्रित भएको स्रोतको दाबी छ। प्रारम्भिक छानबिनले उनलाई योजनाकारका रूपमा देखाएको दाबी गरिए पनि यस विषयमा सम्बन्धित निकायबाट औपचारिक निष्कर्ष सार्वजनिक भइसकेको छैन।

स्रोतका अनुसार एपीएफ स्कुलबाट कल्याणकारी कोषमा जम्मा हुनुपर्ने करिब ९ करोड रुपैयाँ जम्मा नभएको विषयमा हमाल र गुरुङबीच समन्वय भएको आशंकामाथि अनुसन्धान भइरहेको छ।

यसबीच, फागुन महिनामै एपीएफ स्कुलका तत्कालीन समादेशकले कल्याणकारी कोषमा रकम जम्मा भए-नभएकोबारे जानकारी माग्दै पठाएको पत्रसमेत सम्बन्धित कार्यालयमा अभिलेख नभेटिएको विषयमा पनि छानबिन भइरहेको स्रोतले जनाएको छ।

अनुसन्धानको दायरा एपीएफ अस्पतालको पुरानो भवन बिक्री प्रक्रियासम्म विस्तार गरिएको बताइएको छ। २०७२ सालको भूकम्पपछि क्षतिग्रस्त बलम्बुस्थित अस्पताल भवन बिक्रीबाट प्राप्त रकमको व्यवस्थापनबारे समेत विवरण संकलन भइरहेको अनुसन्धान स्रोतको भनाइ छ।

त्यसैगरी डीएसपी हमालको सम्पत्ति, आयस्रोत र व्यक्तिगत आर्थिक अवस्थाबारे पनि अनुसन्धान भइरहेको जनाइएको छ।

प्रहरीले पक्राउ परेका दुवैमाथि आवश्यक अनुसन्धान जारी रहेको छ।