काठमाडौं – भुटानी शरणर्थी प्रकरणमा एमालेका नेता टोपबहादुर रायमाझी र कांग्रेस नेता बालकृष्ण खाँड राज्य विरुद्धको कसुरमा दोषी ठहर भएका छन्। आज जिल्ला अदालत काठमाडौंले पूर्वमन्त्री रायमाझी र खाँडलाई राज्य विरुद्धको कसुरमा दोषी ठहर गरेको हो। उनीहरूसँगै, पूर्व गृहसचिव टेक नारायण पाण्डे, कांग्रेस नेतृ सुजाता कोइरालाका तत्कालीन स्वकीय केशव प्रसाद दुलाल पनि राज्य विरुद्धको कसुरमा दोषी ठहर भएका छन्।

यस्तै प्रकरणमा सात जनाले सफाइ पाएका छन्। अभियुक्तहरू रामशरण केसी, टंककुमार गुरुङ, सन्दीप रायमाझी, प्रतीक थापा, लक्ष्मी महर्जन, केशव तुलाधर र आशिष बुढाथोकीले सफाइ पाएका हुन्। सन्दीप पूर्वउपप्रधानमन्त्री टोपबहादुर रायमाझीका छोरा हुन् भने प्रतीक एमाले उपाध्यक्ष रामबहादुर थापाका छोरा हुन्।