काठमाडाैं। फिफा विश्वकपको पछिल्लो खेलाडी प्रदर्शन तथ्यांकले एउटा रोचक तथ्य सार्वजनिक गरेको छ। अमेरिकी मिडफिल्डर जियोभानी रेयना प्रतियोगितामा औसत दौडने गतिका आधारमा शीर्ष स्थानमा रहेका छन्। यी तथ्यांकले खेलाडी कति तीव्र गतिमा दौडन सक्छ भन्ने मात्र होइन, खेलभर उच्च तीव्रतालाई कति निरन्तर कायम राख्न सक्छ भन्ने पक्षलाई पनि उजागर गर्छ।

तथ्यांकअनुसार रेयनाले प्रतिघण्टा ८ दशमलव ०६ किलोमिटरको औसत गति कायम गरेका छन्। उनीभन्दा थोरै मात्र पछि रहेका चेक गणतन्त्रका मिडफिल्डर अलेक्सान्दर सोज्काले ८ दशमलव ०४ किलोमिटर प्रतिघण्टाको औसत गति कायम गरेका छन्। यी दुईबीचको अन्तर निकै सानो भए पनि विश्व फुटबलमा सानोतिनो अन्तरले पनि उत्कृष्ट खेलाडी छुट्टिने तथ्य यसले देखाउँछ।

रेयनाले प्रतियोगिताका क्रममा कुल १९ हजार २ सय ३ दशमलव ५४ मिटर दूरी तय गरेका छन्। उनले ३ सय १५ पटक उच्च गतिमा दौड गरेका छन् भने ७१ पटक स्प्रिन्ट गरेका छन्। सहनशीलता र विस्फोटक गतिलाई सन्तुलित रूपमा प्रयोग गर्ने उनको क्षमता प्रतियोगिताको प्रमुख आकर्षण बनेको छ।

दोस्रो स्थानमा रहेका अलेक्सान्दर सोज्काले शीर्ष दुई खेलाडीमध्ये सबैभन्दा धेरै १९ हजार ६ सय २८ दशमलव ०७ मिटर दूरी तय गरेका छन्। उनले ३ सय २१ वटा हाई-स्पिड रन र १ सय ८ वटा स्प्रिन्ट गरेका छन्, जुन शीर्ष खेलाडीहरूमध्ये सबैभन्दा धेरै हो। यसले मैदानभर उनको अथक मेहनत र सक्रियतालाई स्पष्ट पार्छ।

साउदी अरेबियाका फरवार्ड अब्दुल्लाह अलहाम्दान ७ दशमलव ८६ किलोमिटर प्रतिघण्टाको औसत गतिसहित तेस्रो स्थानमा छन्। उनले १० हजार ७ सय २६ दशमलव ९७ को मिटर दूरी तय गर्दै १ सय ७० हाई-स्पिड रन र ७० स्प्रिन्ट गरेका छन्। यसले उनको आक्रामक खेलशैली र तीव्र गतिका दौडलाई प्रतिबिम्बित गर्छ।

न्युजिल्यान्डका स्ट्राइकर जेसी र्यान्डल ७.८० किलोमिटर प्रतिघण्टाको औसत गतिसहित चौथो स्थानमा छन्। उनले ११३ हाई-स्पिड रन, ६९ स्प्रिन्ट तथा ९ हजार ३२४.२७ मिटर दूरी तय गरेका छन्, जसले उनलाई प्रतियोगिताका सबैभन्दा सक्रिय फरवार्डमध्ये एक बनाएको छ।

स्विडेनका मिडफिल्डर बेन्जामिन नाइग्रेन ७ दशमलव ७३ किलोमिटर प्रतिघण्टाको औसत गतिसहित पाँचौँ स्थानमा छन्। उनले २८२ हाई-स्पिड रन गर्दै मिडफिल्डमा निरन्तर उच्च गतिमा खेल्ने क्षमता प्रदर्शन गरेका छन्।

शीर्ष १० को सूचीमा जर्मनीका अलेक्सान्दार पाभ्लोभिच , क्यानडाका जेकब शाफेलबर्ग, स्कटल्यान्डका रायन क्रिस्टी, मोरक्कोका सामिर एल मौराबेत र साउदी अरेबियाका मुसाब अल-जुवायर पनि परेका छन्।

अहिले क्लबहरूले जीपीएस ट्र्याकिङ र उन्नत विश्लेषण प्रणालीमार्फत खेलाडीको दौड, कार्यभार, स्प्रिन्ट संख्या तथा रिकभरी अवस्थाको निरन्तर निगरानी गर्छन्। औसत गति अब खेलाडीको वास्तविक क्षमताको महत्वपूर्ण सूचक बनेको छ, किनकि यसले केवल गति मात्र होइन, पूरा खेलभर उच्च तीव्रता कायम राख्ने क्षमतालाई पनि मापन गर्छ।

गोल र असिस्टले सबैभन्दा बढी चर्चा पाए पनि यी तथ्यांकले आधुनिक फुटबलको अर्को महत्वपूर्ण पक्ष उजागर गर्छन्, जहाँ सहनशीलता, निरन्तर प्रेसिङ, बुद्धिमत्तापूर्ण चलायमानता र बारम्बार उच्च गतिमा दौडने क्षमता पनि उत्तिकै निर्णायक हुन्छ।