काठमाडौं। नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले वर्तमान सरकार हिंसात्मक गतिविधिको जगमा बनेको आरोप लगाएका छन्।

आइतबार पार्टी संसदीय मामिला विभागले पार्टी केन्द्रीय कार्यालयमा आयोजना गरेको सांसदहरूसँगको अन्तर्क्रिया कार्यक्रममा बोल्दै अध्यक्ष ओलीले सरकार गठनको प्रक्रिया लोकतान्त्रिक मूल्य र संवैधानिक अभ्यासविपरीत भएको दाबी गरे।

उनले लोकतन्त्रमा सरकार परिवर्तनका लागि संविधान र कानुनले स्पष्ट प्रक्रिया निर्धारण गरेको उल्लेख गर्दै वर्तमान सरकार भने हत्या, हिंसा, तोडफोड, कब्जा र आगजनीजस्ता गतिविधिबाट बनेको आरोप लगाए।

‘लोकतन्त्रमा सरकार परिवर्तन गर्ने कानुनी र संवैधानिक बाटा हुन्छन्। तर अहिलेको सरकार निर्माणको प्रारम्भ नै हत्याहिंसा, तोडफोड, कब्जा र आगजनीबाट भएको हो,’ ओलीले भने।

अध्यक्ष ओलीले मुलुकको राजनीति अहिले परिभाषाविहीन, दिशाविहीन र थितिविहीन अवस्थामा पुगेको टिप्पणी गर्दै गत भदौ २३ र २४ पछिका घटनाक्रमपछि नेपालको राजनीति सही दिशाबाट विचलित भएको दाबी गरे।