काठमाडौं। राष्ट्रिय स्वतन्त्र पार्टी (रास्वपा) का सभापति रवि लामिछाने र उपसभापति तथा अर्थमन्त्री स्वर्णिम वाग्लेबीच २ साउनमा धुलिखेलस्थित दुसित थानी रिसोर्टमा भएको करिब २४ घण्टाको भेटले राजनीतिक वृत्तमा अनेक अड्कलबाजी जन्माएको छ।

प्रधानमन्त्री वालेन्द्र शाह (बालेन) र अर्थमन्त्री वाग्लेबीच सम्बन्ध चिसिएको चर्चा चलिरहेका बेला भएको उक्त भेटलाई धेरैले सरकारभित्रको शक्ति समीकरणसँग जोडेर हेरिएको हो ।

तर, स्रोतहरूका अनुसार वास्तविकता भने फरक रहेको दाबी गरिएको छ। धुलिखेलमा भएको उक्त भेट लामिछाने र वाग्लेबीचको गोप्य छलफल मात्र नभई प्रधानमन्त्री बालेनसमेत सहभागी हुने गरी पूर्वतयारी गरिएको कार्यक्रम रहेको जनाइएको छ।

अन्तिम समयमा स्वास्थ्यमा समस्या देखिएपछि मात्रै प्रधानमन्त्री उक्त भेटमा सहभागी हुन नसकेको स्रोतको भनाइ छ।

स्रोतका अनुसार काठमाडौंबाट अर्थमन्त्री वाग्ले र मधेश प्रदेशको कार्यक्रम सकेर सभापति लामिछाने धुलिखेल पुगेका थिए। तीनै जना एउटै स्थानमा बसेर समसामयिक राजनीतिक अवस्था, सरकारको कामकारबाही र पार्टीभित्र तथा बाहिर फैलिएका विभिन्न चर्चाबारे छलफल गर्ने सहमति यसअघि नै बनेको थियो।

यस भेटभन्दा करिब एक साताअघि प्रधानमन्त्री बालेन र सभापति लामिछानेबीच बूढानीलकण्ठस्थित निवासमा झण्डै चार घण्टा लामो एकल वार्ता भएको थियो। त्यस वार्ताको निरन्तरताका रूपमा धुलिखेलमा तीन नेताको संयुक्त छलफल तय गरिएको स्रोतको दाबी छ।

प्रधानमन्त्री सचिवालयनिकट स्रोतका अनुसार बालेन अन्तिम समयमा अस्वस्थ भएपछि धुलिखेल जान सकेनन्। स्रोतले जनाएको छ कि लामिछाने र वाग्लेको भेट प्रधानमन्त्रीको जानकारीबाहिर भएको होइन, बरु तीनै जनाको सहमतिअनुसार तय गरिएको कार्यक्रमको एक अंश मात्र थियो।

वाग्लानिकट स्रोतले पनि तीन नेताको संयुक्त भेटको योजना बनेको स्वीकार गर्दै पछिल्ला दिनमा प्रधानमन्त्री बालेन सार्वजनिक जमघट तथा अनौपचारिक भेटघाटमा कम सहभागी हुँदै आएको जनाएको छ। स्वास्थ्य र व्यक्तिगत जीवनशैलीका कारण उनी त्यस्ता कार्यक्रममा सीमित हुन थालेको स्रोतको भनाइ छ।

दुसित थानी रिसोर्ट छनोट गरिएको विषय पनि राजनीतिक वृत्तमा चर्चा बनेको छ। अर्थमन्त्री वाग्लेको लगानी रहेको भनिएको उक्त रिसोर्टमै भेट आयोजना गरिएकाले त्यसको राजनीतिक सन्देशबारे विभिन्न अड्कलबाजी भए। तर स्रोतहरूका अनुसार स्थान छनोटलाई लिएर कुनै विशेष राजनीतिक उद्देश्य नरहेको दाबी गरिएको छ।

यद्यपि सिंहदरबार र सत्ता वृत्तमा यो भेटलाई मन्त्रिपरिषद् पुनर्गठन, सरकारभित्रको शक्ति सन्तुलन तथा रास्वपाभित्रको आन्तरिक समीकरणसँग जोडेर विभिन्न विश्लेषण भइरहेका छन्। पछिल्ला केही सातादेखि मन्त्रिपरिषद् हेरफेर हुन सक्ने चर्चा चले पनि स्रोतहरूले त्यसको खण्डन गरेका छन्।

स्रोतका अनुसार तीन नेताले संयुक्त रूपमा देखिएर सरकारभित्र कुनै विवाद नरहेको र मन्त्रिपरिषद् पुनर्गठनको हल्ला निराधार रहेको सन्देश दिने उद्देश्य राखेका थिए। तर प्रधानमन्त्री उपस्थित हुन नसकेपछि योजना अनुसारको संयुक्त भेट हुन सकेन र त्यसको सट्टा रवि र वाग्लेबीच मात्र छलफल भएको थियो।

प्रधानमन्त्रीको अनुपस्थितिपछि उक्त भेटलाई लिएर विभिन्न अड्कलबाजी भए पनि स्रोतहरूले त्यसलाई सामान्य परिस्थितिको परिणाम भएको दाबी गरेका छन्। सरकारभित्र नेतृत्वबीच संवाद र समन्वय कायम रहेको तथा बाहिर फैलिएका हल्लाजस्तो कुनै असामान्य अवस्था नरहेको उनीहरूको भनाइ छ।