काठमाडौं। राष्ट्रिय स्वतन्त्र पार्टी (रास्वपा) भित्र औपचारिक रूपमा स्वीकार नगरिए पनि विभिन्न समूहबीचको शक्ति सन्तुलन र अवसरको प्रतिस्पर्धा बढ्दै गएको चर्चा छ।

पार्टीभित्र मूल नेतृत्वसँगै ‘स्थापन रास्वपा अर्थात रवि रास्वपा’, ‘बालेन समूह’ र ‘विवेकशील साझा’ पृष्ठभूमिबाट आएका नेताहरूबीच प्रभाव विस्तारको प्रयास भइरहेको छ।

पार्टी स्रोतका अनुसार आगामी दिनमा मन्त्रिपरिषद् पुनर्गठन वा राजनीतिक परिस्थितिमा परिवर्तन आए मन्त्री तथा अन्य जिम्मेवारीमा आफ्ना समूहका नेताहरूलाई अघि सार्ने तयारी प्रत्येक पक्षले गरिरहेको छ।

संसदीय समिति, मन्त्री पद तथा पार्टीको आगामी महाधिवेशनमा पदाधिकारी चयनलाई लक्षित गर्दै आन्तरिक समीकरणसमेत चलिरहेको चर्चा छ।

यद्यपि, पार्टी नेतृत्व भने रास्वपाभित्र गुट वा धार रहेको दाबी स्वीकार गर्न तयार देखिएको छैन।

रास्वपाका एक नेताले पार्टीभित्र तीन धार रहेको विश्लेषणलाई अस्वीकार गर्दै त्यसलाई सतहबाट गरिएको व्याख्या मात्र भएको बताएका छन्।

फरक पृष्ठभूमिबाट आएका व्यक्तिहरू एउटै उद्देश्यका साथ पार्टीमा आबद्ध भएकाले त्यसलाई गुटबन्दीका रूपमा बुझ्न नहुने उनको तर्क छ। उनले भने, ‘तीन धार कहाँबाट हुन्छ? त्यस्तो होइन। यो त तीन परिवारका मानिस एउटै तीर्थयात्रामा निस्किए भने तीन धार भन्नेजस्तै कुरा हो।’

यद्यपि राजनीतिक वृत्तमा भने पार्टीभित्र फरक पृष्ठभूमिका नेताहरूबीच भविष्यको नेतृत्व, संगठन र सरकारमा प्रतिनिधित्वका विषयमा आन्तरिक प्रतिस्पर्धा क्रमशः बढ्दै गएको विश्लेषण भइरहेको छ।