काठमाडौं। धनगढीमा आमरण अनशनरत प्राध्यापक डा. गोविन्द केसीको स्वास्थ्य अवस्था बिग्रँदै गएको छ।

बिहीबारदेखि धनगढीस्थित कृष्ण मन्दिरको धर्मशालामा अनशन बसिरहेका डा. केसीको स्वास्थ्य परीक्षणपछि चिकित्सकले उनलाई आईसीयूमा भर्ना गर्न सुझाव दिएका छन्।

सेती प्रादेशिक अस्पतालका चिकित्सकले गरेको परीक्षणमा डा. केसीको रक्तचाप ११०/९० मापन गरिएको छ भने रगतमा सुगरको मात्रा ५० पुगेको पाइएको छ। लामो समयदेखि निराहार बसेका कारण स्वास्थ्यमा थप जटिलता आउन सक्ने भन्दै चिकित्सकले निगरानी बढाउन र आवश्यक परे सघन उपचार कक्ष (आईसीयू) मा राख्न सिफारिस गरेका हुन्।

डा. केसी दशरथचन्द स्वास्थ्य विज्ञान विश्वविद्यालयसँग सम्बन्धित नियुक्ति खारेज गर्नुपर्ने माग राख्दै अनशनमा बसेका छन्। यद्यपि, उनको आन्दोलनलाई लिएर धनगढीमा विरोधसमेत देखिएको छ।

अनशनस्थल बाहिर संघर्ष समितिको नेतृत्वमा प्रदर्शन गर्दै केही प्रदर्शनकारीले ‘गोविन्द केसी गो ब्याक’ भन्दै नाराबाजी गरेका छन्। विरोध प्रदर्शनलाई मध्यनजर गर्दै कृष्ण मन्दिरको धर्मशाला परिसरमा सुरक्षा व्यवस्था कडा पारिएको छ।