काठमाडौं। नेपाली कांग्रेसका सभापति गगन थापाले सुनसरी घटनाको विषयमा छलफल गर्न बोलाइएको सर्वदलीय बैठकमा प्रधानमन्त्री वालेन्द्र शाह (बालेन) र सरकारको अनुपस्थितिमाथि प्रश्न उठाएका छन्।

राष्ट्रिय स्वतन्त्र पार्टी (रास्वपा) का सभापति रवि लामिछानेको आह्वानमा सिंहदरबारमा आयोजित बैठकमा बोल्दै थापाले सुनसरी घटनालाई राज्य संयन्त्रको असफलताको संकेतका रूपमा व्याख्या गरे। उनले यस्तो संवेदनशील अवस्थामा सरकार आफैं अग्रसर भएर सबै राजनीतिक दललाई एकै ठाउँमा ल्याउनुपर्ने धारणा राखे।

बैठक आयोजना गरी साझा पहल थालेको भन्दै उनले रास्वपा सभापति लामिछानेलाई धन्यवाद दिँदै अहिले सरकारको भूमिकामाथि गम्भीर प्रश्न उठिरहेको बताए।

थापाले सरकारलाई प्रश्न सोध्दै भनेका छन्, ‘यतिखेर सरकार के गर्दैछ ? सरकार कहाँ छ ? सरकार स्टाटसमा सीमित छ। सरकारले अरूलाई विश्वास गरेर सबै पक्षलाई समेट्नुपर्छ।’

थापाले संकटका बेला प्रधानमन्त्रीले तत्काल सर्वदलीय बैठक बोलाउनुका साथै राष्ट्रपति, प्रदेश सरकार र स्थानीय तहसँग समन्वय गरी साझा रणनीति बनाउनुपर्ने बताए। विगतका राष्ट्रिय विपत्तिमा राजनीतिक दलहरू मतभेद बिर्सेर एकजुट भएको स्मरण गराउँदै अहिले पनि त्यही अभ्यास आवश्यक रहेको उनको भनाइ थियो।

‘यस्तो बेला प्रधानमन्त्रीले भाउ खाएर वा ठालू बनेर बस्ने होइन। नेतृत्वदायी भूमिका निर्वाह गर्दै सबैलाई एक ठाउँमा ल्याएर सकारात्मक पहल गर्नुपर्छ’, उनले भने। 

थापाले नेपाली कांग्रेसले पनि सुनसरी घटनाबारे आन्तरिक रूपमा समीक्षा गर्ने, आफ्ना नेता तथा जनप्रतिनिधिलाई प्रभावित क्षेत्रमा सक्रिय भएर सामाजिक सद्भाव कायम गर्न भूमिका खेल्न निर्देशन दिएको जानकारी दिए। साथै, सरकारले समस्या समाधानका लागि चाल्ने सकारात्मक कदममा कांग्रेसको सहयोग रहने उनले बताए।

रास्वपा सभापति रवि लामिछानेले बोलाएको उक्त सर्वदलीय बैठकमा प्रधानमन्त्री बालेन्द्र शाह, गृहमन्त्री सुधन गुरुङ, नेकपा एमालेका अध्यक्ष केपी शर्मा ओली तथा श्रम संस्कृति पार्टीका अध्यक्ष हर्क साम्पाङ भने उपस्थित भएनन्।