काठमाडौं । प्रधानमन्त्री वालेन्द्र शाह (बालेन) ले बुधबारका लागि मन्त्रिपरिषद्को बैठक बोलाएका छन् ।

प्रधानमन्त्री तथा मन्त्रिपरिषद्को कार्यालय सिंहदरबारमा उनले बैठक बोलाएका हुन्।

प्रधानमन्त्री कार्यालयका अनुसार बैठकमा सरकारका नियमित कामकारबाहीसँगै पछिल्लो राजनीतिक अवस्था, प्रशासनिक गतिविधि र समसामयिक विषयमा छलफल हुनेछ ।

बैठकमा विभिन्न मन्त्रालयबाट आएका प्रस्ताव तथा एजेन्डामाथि छलफल गरी आवश्यक निर्णय लिइने बताइएको छ । सरकारको कार्यसम्पादन, आगामी योजना तथा मन्त्रालयगत कामको प्रगतिबारे समेत समीक्षा हुने अपेक्षा गरिएको छ ।

पछिल्लो समय सुनसरीको कप्तानगञ्ज क्षेत्रमा भएको तनावपूर्ण घटनापछि राजनीतिक दलहरूबीच सर्वदलीय छलफल भइरहेका बेला प्रधानमन्त्रीले मन्त्रिपरिषद् बैठक बोलाएका हुन् । उक्त घटनालाई लिएर सरकारको भूमिका र सुरक्षा व्यवस्थामाथि विभिन्न राजनीतिक दलले प्रश्न उठाउँदै आएका छन् ।

यसअघि राष्ट्रिय स्वतन्त्र पार्टी (रास्वपा) सभापति रवि लामिछानेको पहलमा सिंहदरबारमा बसेको सर्वदलीय बैठकले सामाजिक सद्भाव कायम राख्न, संवादमार्फत समस्या समाधान गर्न र घटनाको निष्पक्ष छानबिन गर्न सरकारलाई आग्रहसहित संयुक्त अपिल जारी गरेको थियो ।

मन्त्रिपरिषद् बैठकमा यिनै समसामयिक राजनीतिक विषयसहित सरकारका आगामी कदमबारे समेत छलफल हुन सक्ने बताइएको छ ।