काठमाडौं। सुनसरीको देवानगञ्ज गाउँपालिका–३, कप्तानगञ्ज क्षेत्रमा उत्पन्न तनावपछि नेपाली सेनाले हवाई गस्ती सुरु गरेको छ।

सुरक्षा अवस्था सामान्य बनाउन सेना र प्रहरीले स्थल तथा आकाश दुवै माध्यमबाट निगरानी बढाएका छन्।

नेपाली सेनाका प्रवक्ता तथा सहायक रथी राजाराम बस्नेतका अनुसार क्षेत्रको सुरक्षा अवस्था र वस्तुस्थितिको अनुगमन गर्न सेनाले हेलिकोप्टरमार्फत हवाई गस्ती गरेको हो। उनका अनुसार बुधबारसम्म सुनसरीको अवस्था तुलनात्मक रूपमा शान्त रहेको छ।

कर्फ्यु आदेश जारी भएपछि नेपाली सेना प्रभावित क्षेत्रमा परिचालित भएको थियो। सेनाले पैदल गस्तीका साथै हवाई निगरानीसमेत जारी राखेर शान्ति–सुरक्षा कायम गर्ने प्रयास गरिरहेको जनाएको छ।

उता नेपाल प्रहरीले पनि ड्रोन प्रयोग गरेर कप्तानगञ्ज क्षेत्रको अवस्थाको निगरानी गरिरहेको छ। सुरक्षा निकायले संवेदनशील स्थानहरूको नियमित अनुगमन गर्दै सम्भावित अप्रिय घटना रोक्न सुरक्षा सतर्कता बढाएको जनाएको छ।

देवानगञ्ज–३ को कप्तानगञ्ज क्षेत्रमा आइतबार दुई समूहबीच विवाद भएपछि स्थिति तनावग्रस्त बनेको थियो। सुरक्षा निकायका अनुसार झण्डा हटाउने विषय र चर्को आवाजमा डिजे बजाउने विषयलाई लिएर दुई पक्षबीच विवाद बढेपछि झडप भएको थियो। स्थिति नियन्त्रणमा लिने क्रममा सुरक्षाकर्मीले गोली चलाउँदा २४ वर्षीय ओमप्रकाश मेहताको मृत्यु भएको थियो।

घटनामा अन्य नौ जना सर्वसाधारण घाइते भएका थिए। त्यसपछि क्षेत्रको अवस्था थप तनावपूर्ण बनेको थियो। मंगलबार पुनः झडप, तोडफोड र आगजनीका घटना भएपछि सुरक्षा व्यवस्था थप कडा पारिएको थियो।

हाल जिल्ला प्रशासन, नेपाली सेना र नेपाल प्रहरीले संयुक्त रूपमा सुरक्षा व्यवस्थापन गरिरहेका छन्।

प्रशासनले स्थानीयवासीलाई अफवाहमा नलाग्न, संयमता अपनाउन र शान्ति कायम राख्न सहयोग गर्न आग्रह गरेको छ।