काठमाडौं। प्रधानमन्त्री वालेन्द्र शाहको अध्यक्षतामा बुधबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा बसेको मन्त्रिपरिषद् बैठकले विभिन्न नीतिगत र प्रशासनिक निर्णयहरू गरेको छ।

तर, पछिल्ला दिनदेखि राष्ट्रिय चासोको विषय बनेको सुनसरीको देवानगञ्ज घटनाबारे सरकारले कुनै औपचारिक निर्णय सार्वजनिक गरेन।

बैठकपछि सरकारका प्रवक्ता तथा शिक्षामन्त्री सस्मित पोखरेलले मन्त्रिपरिषद्का निर्णयहरू सार्वजनिक गरे। उनले विभिन्न विधेयक संसद्मा पेश गर्ने, नियुक्ति तथा नियमावली स्वीकृतिसहितका निर्णयबारे जानकारी दिए। तर सुनसरी घटनाका सम्बन्धमा राहत, क्षतिपूर्ति, छानबिनको प्रगति वा थप सरकारी कदमबारे कुनै जानकारी गराइएन।

पत्रकार सम्मेलनमा सञ्चारकर्मीहरूले सुनसरी घटनाबारे मन्त्रिपरिषद्ले के निर्णय गर्‍यो, पीडित परिवारलाई राहत वा क्षतिपूर्तिको विषयमा छलफल भयो कि भएन भन्ने प्रश्न गरेका थिए। तर प्रवक्ता पोखरेलले त्यसबारे कुनै प्रतिक्रिया नदिई ‘आजलाई यति नै’ भन्दै पत्रकार सम्मेलन समाप्त गरेका थिए।

सुनसरी घटनापछि सरकारले पाँच सदस्यीय छानबिन समिति गठन गरिसकेको छ भने प्रभावित क्षेत्रमा सुरक्षा व्यवस्था कडा पारिएको छ।

यसैबीच पीडित परिवारलाई राहत तथा क्षतिपूर्तिको विषयमा सरकारले स्पष्ट निर्णय सार्वजनिक गर्ने अपेक्षा गरिए पनि बुधबारको मन्त्रिपरिषद् बैठकपछि त्यसबारे कुनै औपचारिक धारणा सार्वजनिक भएको छैन।