गणेश यादवका आफन्तले गरे बालेन-सुधनविरुद्ध प्रदर्शन
Nepal One HD १५ साउन २०८३ १४:५४
सिरहा। सिरहाको गोलबजारमा प्रदर्शनका क्रममा गोली लागेर मृत्यु भएका १५ वर्षीय गणेश यादवका आफन्त तथा स्थानीयले प्रधानमन्त्री बालेन शाह र गृहमन्त्री सुदन गुरुङविरुद्ध प्रदर्शन गरेका छन्।
सुनसरीको कप्तानगञ्ज घटनालाई लिएर गोलबजारमा भएको प्रदर्शनका क्रममा औरही गाउँपालिका–२ तुलसियाहीका गणेशको मृत्यु भएको थियो। गृहमन्त्री गुरुङ मृतक परिवारलाई भेट्न सिरहा आउने जानकारी पाएपछि उनका आफन्त तथा स्थानीयले बनिनिया चोकमा प्रदर्शन गरेका हुन्।
प्रदर्शनकारीले हातमा विभिन्न प्लेकार्ड बोकेर प्रधानमन्त्री शाह र गृहमन्त्री गुरुङविरुद्ध नाराबाजी गरेका थिए। उनीहरूले गोली लागेर १५ वर्षीय बालकको मृत्यु भएको घटनाप्रति आक्रोश व्यक्त गर्दै दोषीमाथि कारबाही र परिवारलाई न्याय दिन माग गरेका छन्।
स्थानीयले मृतक गणेशले न्याय नपाएसम्म गृहमन्त्रीलाई आफ्नो क्षेत्रमा प्रवेश गर्न नदिने चेतावनीसमेत दिएका छन्।
गोलबजारमा भएको प्रदर्शनका क्रममा प्रहरीले गोली चलाउँदा बालकको मृत्यु भएको घटनाले स्थानीयमा आक्रोश बढेको छ।
मृतक परिवारसँग भेट गरी घटनाबारे जानकारी लिन गृहमन्त्री गुरुङ सिरहा जाने तयारीमा रहेका बेला विरोध प्रदर्शन भएको हो।
तस्वीरहरू:
