काठमाडौं । नेपाली कांग्रेसका सभापति गगन थापाले विपद्को समयमा प्रभावकारी रूपमा काम गर्न केवल इच्छाशक्ति र भावनाले नपुग्ने बताएका छन्।

विपद् व्यवस्थापनका लागि आवश्यक ज्ञान, सीप र व्यावहारिक प्रशिक्षणलाई संगठनको कार्यशैलीकै हिस्सा बनाउनुपर्ने उनको भनाइ छ।

नेपाली कांग्रेसको केन्द्रीय नीति, अनुसन्धान तथा प्रशिक्षण प्रतिष्ठानले आयोजना गरेको ‘पूर्वतयारी तथा प्रतिकार्य प्रशिक्षण’ कार्यक्रमको उद्घाटन गर्दै थापाले विपद्का बेला तत्काल उद्धार, राहत तथा समन्वयमा खटिन सक्ने गरी नेता–कार्यकर्तालाई प्रशिक्षित गर्नुपर्ने बताए।

केही दिनअघि सुनसरीको देवानगञ्जमा भएको घटनाको उदाहरण दिँदै थापाले सामाजिक सद्भाव जोगाउन कांग्रेसका स्थानीय नेता–कार्यकर्ताले तत्काल सक्रियता देखाएको बताए। घटनापछि पार्टी नेतृत्वले स्थानीय तहका कार्यकर्तासँग निरन्तर सम्पर्क गरी हिंसा र उत्तेजना फैलिन नदिन आवश्यक भूमिका खेल्न निर्देशन दिएको उनले जानकारी दिए।

संकटको समयमा स्थानीय तहलाई पार्टी नेतृत्व आवश्यक सहयोगका लागि साथमा रहने विश्वास दिलाइएको पनि उनले बताए। सामाजिक सद्भाव र समुदायबीचको एकता कायम गर्नु कांग्रेसको ऐतिहासिक जिम्मेवारी भएको थापाको भनाइ छ।

उनले कांग्रेसको राष्ट्रिय हैसियतलाई केवल निर्वाचनमा प्राप्त मत वा सिटको संख्यासँग मात्र जोडेर हेर्न नहुने बताए। पार्टीको इतिहास, मूल्य, अनुभव र समाजप्रतिको जिम्मेवारीले पनि राष्ट्रिय शक्ति निर्धारण गर्ने उनको तर्क थियो।

थापाले पार्टीभित्र पदको संख्या सीमित भए पनि आकाङ्क्षीको संख्या धेरै हुने अवस्थाले संगठनमा चुनौती थपेको बताए। त्यसैले नेता–कार्यकर्ताले पदको प्रतिस्पर्धाभन्दा समाजमा सकारात्मक प्रभाव पार्ने कामलाई प्राथमिकता दिनुपर्नेमा उनले जोड दिए।

कांग्रेसका संस्थापक नेताहरूले व्यक्तिगत पद वा सत्ता प्राप्तिका लागि नभई नागरिक तथा मानव सेवाको उद्देश्यले पार्टी निर्माण गरेको स्मरण गर्दै थापाले अहिलेका चुनौती सामना गर्न पनि सेवा, जिम्मेवारी र प्रशिक्षणलाई केन्द्रमा राख्नुपर्ने बताए।

उनका अनुसार आगामी भदौ २४ गतेदेखि देशभरका कांग्रेस नेता-कार्यकर्तालाई वर्षभरि निरन्तर सामाजिक उत्तरदायित्वका गतिविधिमा जोड्ने योजना अघि बढाइएको छ।

प्रत्येक नेता–कार्यकर्ताले कम्तीमा एउटा सामाजिक उत्तरदायित्वसँग सम्बन्धित काममा सक्रिय सहभागिता जनाउने गरी कार्यक्रम सञ्चालन गरिने उनले जानकारी दिए।

थापाले विपद् तथा संकटका बेला राजनीतिक संगठनको भूमिका प्रभावकारी बनाउन नियमित प्रशिक्षण, पूर्वतयारी र स्थानीय तहसँगको समन्वयलाई संस्थागत गर्नुपर्ने आवश्यकता औँल्याए।