सिरहा। जिल्ला प्रशासन कार्यालय सिरहाले गोलबजार नगरपालिकाको बजार क्षेत्रमा जारी कर्फ्यु आदेश शनिबार दुई घण्टाका लागि खुकुलो बनाएको छ।

प्रमुख जिल्ला अधिकारी सुरेन्द्र पौडेलले जारी गरेको सूचनाअनुसार सर्वसाधारणलाई दैनिक उपभोग्य सामग्री खरिद गर्न सहज बनाउन तथा पछिल्लो सुरक्षा अवस्थाको विश्लेषण गर्दै दिउँसो ३ बजेदेखि ५ बजेसम्म कर्फ्यु खुकुलो पारिएको हो।

कर्फ्यु खुकुलो भएको समयमा गोलबजार हुँदै सञ्चालन हुने लामो दूरीका सवारीसाधनको आवतजावत सहज बनाउन सुरक्षा निकायलाई आवश्यक सहजीकरण गर्न निर्देशन दिइएको प्रशासनले जनाएको छ।

यद्यपि, कर्फ्यु खुकुलो पारिएको अवधिमा समेत ५ जनाभन्दा बढीको समूहमा भेला हुन रोक लगाइएको छ। सुरक्षा अवस्था पूर्ण रूपमा सामान्य नभएसम्म प्रशासनले जारी गरेका निर्देशनको पालना गर्न सर्वसाधारणलाई आग्रह गरिएको छ।

गोलबजारमा पछिल्लो समय उत्पन्न तनावपूर्ण अवस्थालाई मध्यनजर गर्दै प्रशासनले कर्फ्यु आदेश जारी गरेको थियो। बजार तथा आसपासको क्षेत्रमा सुरक्षा निगरानीसमेत बढाइएको छ।