काठमाडौं। देशको सर्वोच्च राजनीतिक नेतृत्वमध्येका वर्तमान सभामुखको पुर्ख्यौली गाउँ र धादिङ-२ का सांसदको गृहगाउँ नै वर्षा लाग्नेबित्तिकै सडक समस्याले थलिने गरेको छ। धादिङको ज्वालामुखी गाउँपालिका–२ मैदीमा वर्षौँदेखि सडकको समस्या समाधान हुन नसक्दा स्थानीयले सास्ती खेप्दै आएका छन्।

निर्वाचनका बेला विकासका प्रतिबद्धता गर्ने नेताहरू राज्यको उच्च तहमा पुगे पनि गाउँ जोड्ने सडकको अवस्था भने उस्तै रहेको स्थानीयको गुनासो छ। वर्षा सुरु हुनासाथ सडक हिलो र लेदोले भरिने तथा ठाउँ–ठाउँमा यातायात अवरुद्ध हुने समस्या हरेक वर्ष दोहोरिने गरेको छ।

ज्वालामुखी गाउँपालिकाका वडा नम्बर १, २, ३ र ४ जोड्ने ससाह-अमराईँ-मैदी सडक, पाल्पा भञ्ज्याङ-साँधभञ्ज्याङ-मैदी सडक तथा ढोला-मैदी सडक लगातारको वर्षापछि हिलाम्मे बनेका छन्। सडकको अवस्था बिग्रिएपछि सवारीसाधन सञ्चालन गर्न कठिन भएको छ। कतिपय स्थानमा बोलेरो जस्ता गाडीलाई डोजरको सहायताले तानेर वारपार गराउनुपर्ने अवस्था आएको स्थानीयको भनाइ छ।

सडक अवरुद्ध हुँदा गाउँबाट बाहिरिने र गाउँ फर्किने यातायात प्रभावित भएको छ। दैनिक आवतजावतदेखि अत्यावश्यक स्वास्थ्य सेवासम्म प्रभावित बनेको स्थानीय बताउँछन्। गम्भीर बिरामीलाई अस्पताल लैजानुपर्ने अवस्थामा एम्बुलेन्ससमेत सहज रूपमा सञ्चालन गर्न नसकिने अवस्था रहेको उनीहरूको गुनासो छ।

अत्यधिक हिलोका कारण मोटरसाइकल सञ्चालन गर्नसमेत कठिन भएको छ। वडा नम्बर ३ को डुँडेभञ्ज्याङ, बरामगाउँ तथा वडा नम्बर ४ का विभिन्न क्षेत्रमा सडक पैदल हिँड्नसमेत कठिन हुने गरी बिग्रिएका छन्। वैकल्पिक सडकको अभावले समस्या थप गम्भीर बनेको स्थानीयको भनाइ छ।

ससाह–अमराईँ–मैदी सडकअन्तर्गत नीलकण्ठ नगरपालिका-८ को धौखोला खेत क्षेत्रमा सडक बिग्रिएपछि केही दिनदेखि मैदीतर्फको नियमित यातायात सेवा प्रभावित भएको छ। गाउँ पुग्ने विभिन्न सडक अवरुद्ध हुँदा आकस्मिक स्वास्थ्य सेवा प्रभावित हुने जोखिम बढेको छ।

स्थानीय स्वास्थ्य संस्थामा उपचार सम्भव नभएका बिरामीलाई जिल्ला सदरमुकाम लैजानसमेत कठिन हुने गरेको स्थानीयको भनाइ छ। स्वास्थ्यकर्मीको अभाव वा कुनै विपद्का बेला सडकको यही अवस्थाले समस्या थप गम्भीर बनाउन सक्ने भन्दै उनीहरूले चिन्ता व्यक्त गरेका छन्।

स्थानीयवासीका अनुसार सडकको समस्या हरेक वर्ष दोहोरिए पनि यसको दीर्घकालीन समाधान हुन सकेको छैन। सडक निर्माण तथा स्तरोन्नतिको काम समयमै सम्पन्न नहुनु र वर्षायाममा नदीजन्य सामग्री उत्खननमा हुने कानुनी प्रतिबन्धका कारण मर्मत तथा सुधारका काम प्रभावित हुने गरेको उनीहरूको भनाइ छ।

यता गाउँपालिकाले भने सडकमा सवारीसाधन फसे तत्काल स्काभेटर वा डोजर परिचालन गरेर यातायात सञ्चालन गराउने व्यवस्था गरेको जनाएको छ। एम्बुलेन्स सञ्चालन आवश्यक परे उपकरण तथा जनशक्ति परिचालन गरेर सेवा निरन्तर राख्ने प्रयास भइरहेको गाउँपालिकाको भनाइ छ।

सडक स्तरोन्नतिको काम जारी रहेकाले नीलकण्ठ क्षेत्रमा सडक बिग्रिँदा त्यसको प्रत्यक्ष असर मैदी क्षेत्रमा परेको स्थानीय तहको भनाइ छ। वर्षा कम भएपछि सडकको स्थायी मर्मत तथा निर्माणलाई तीव्रता दिने तयारी गरिएको जनाइएको छ।