महोत्तरी । महोत्तरीको गौशाला नगरपालिकामा मंगलबार बिहान विद्यालय बस दुर्घटना हुँदा चालकसहित पाँच विद्यार्थी घाइते भएका छन्।

प्रहरीका अनुसार बिहान करिब ७:३० बजे गौशाला नगरपालिका–९ डुमरवानास्थित भित्री सडकमा मोर्डन सारदा शिक्षा सदन बोर्डिङ स्कुलको बा १ क ६१२९ नम्बरको बस इमली बजारबाट गौशालतर्फ जाँदै थियो। सोही क्रममा बस अचानक नियन्त्रण बाहिरिएर सडक छेउको उखुबारीमा खसेको हो।

दुर्घटनामा बस चालक गौशाला नगरपालिका–५ का करिब ४० वर्षीय विजय भुजेल घाइते भएका छन्। साथै गौशाला–११ का महेश्वर महतोका १० वर्षीय छोरा प्रतिक कुशवाहा, ८ वर्षीय प्रज्वल कुशवाहा र १३ वर्षीया प्रिति कुशवाहा पनि घाइते भएका छन्।

त्यसैगरी गौशाला–९ का शेख जावेदका १३ वर्षीय छोरा उमर शेख तथा गौशाला–११ का रमेश कुमार महतोका ६ वर्षीय छोरा आदर्श कुशवाहा पनि दुर्घटनामा परेका छन्।

घटनाको जानकारी प्राप्त हुनासाथ प्रहरी चौकी कान्तिबजारबाट खटिएको टोलीले घाइतेहरूको उद्धार गरेको थियो। उनीहरूलाई उपचारका लागि गौशालास्थित बीके अस्पताल तथा अन्य स्थानीय स्वास्थ्य संस्थामा लगिएको प्रहरीले जनाएको छ।

महोत्तरी जिल्ला प्रहरी कार्यालयका प्रवक्ता डीएसपी पञ्चलाल गोलेका अनुसार दुर्घटनाको कारण खुल्न बाँकी रहेको छ। घटनाबारे थप अनुसन्धान भइरहेको प्रहरीले जनाएको छ।