काठमाडौं। प्रतिनिधिसभाको बैठक सुरु भएलगत्तै विपक्षी दलका सांसदहरूले उठेर विरोध जनाएका छन्।

सिंहदरबारस्थित संघीय संसद् भवनमा मंगलबार सभामुख डोलप्रसाद अर्यालले बैठक सुरु गर्नासाथ नेपाली कांग्रेस, नेकपा एमाले, नेपाली कम्युनिष्ट पार्टी, श्रम संस्कृति पार्टी र राष्ट्रिय प्रजातन्त्र पार्टीका सांसदहरू आ–आफ्नो स्थानबाट उठेका हुन्।

प्रधानमन्त्री बालेन्द्र शाहको अभिव्यक्तिलाई लिएर विपक्षी दलहरूले यसअघि पनि प्रतिनिधिसभा बैठकमा विरोध गर्दै आएका छन्।

गत जेठ १७ गते प्रतिनिधिसभाको बैठकमा प्रधानमन्त्री शाहले ‘भारतको भूमि नेपालले पनि मिचेको छ’ भन्ने आशयको जवाफ दिएपछि विपक्षी दलहरूले निरन्तर आपत्ति जनाउँदै आएका हुन्।

विपक्षी दलहरूले प्रधानमन्त्री शाहबाट उक्त अभिव्यक्तिबारे स्पष्ट जवाफ माग्दै आएका छन्। तर, हालसम्म प्रधानमन्त्री शाहले त्यसबारे औपचारिक स्पष्टीकरण दिएका छैनन्।

त्यस्तै, उक्त अभिव्यक्ति संसद्को अभिलेखबाट हटाउन सभामुख अर्यालले संसद् सचिवालयलाई निर्देशनसमेत दिएका छैनन्।

यही विषयलाई लिएर विपक्षी सांसदहरूले बैठकमा उठेर विरोध जनाउँदै आएका छन्।