काठमाडौं। नेपाली कांग्रेसका सचेतक निश्कल राईले प्रधानमन्त्रीको नेतृत्वमा स्थायी प्रकृतिको सर्वदलीय, सर्वधार्मिक तथा नागरिक संवाद संयन्त्र गठन गर्न माग गरेका छन्।

प्रतिनिधिसभाको बैठकमा बोल्दै राईले प्रस्तावित संयन्त्रमा हिन्दु, मुस्लिम, बौद्ध, किरात, इसाईलगायत धार्मिक समुदायका साथै स्थानीय सरकार, नागरिक समाज, महिला, युवा र सुरक्षा निकायको समान प्रतिनिधित्व हुनुपर्ने बताए।

सामाजिक तनावका प्रारम्भिक संकेत देखिनासाथ संयन्त्रले संवादको पहल गर्नुपर्ने उनको भनाइ छ। यस्तो संयन्त्रले समयमै संवादमार्फत सम्भावित द्वन्द्व र तनाव नियन्त्रणमा सहयोग पुग्ने उनले बताए।

राईले सुनसरीमा भएको घटनाको निष्पक्ष अनुसन्धान गरी घटनाको कारण, सुरक्षा व्यवस्थामा देखिएका कमजोरी, अफवाहको भूमिका तथा राज्यको प्रतिक्रियाबारे विस्तृत प्रतिवेदन सार्वजनिक गर्न सरकारसँग माग गरे।

उनले सामाजिक सञ्जालमार्फत घृणा र झुटा सूचना फैलाउनेमाथि कानुनअनुसार कारबाही गर्नुपर्ने बताए। तर कुनै धर्म वा समुदायलाई सामूहिक रूपमा शंकाको घेरामा राख्न नहुनेमा उनले जोड दिए।

सरकारलाई सहयोगी, पारदर्शी र खुला बन्न आग्रह गर्दै राईले संवेदनशील विषयमा गरिने निर्णय बन्द कोठामा नभई खुला राष्ट्रिय संवादमार्फत अघि बढाउनुपर्ने बताए।

उनका अनुसार असहमति दबाएर सामाजिक एकता कायम गर्न सकिँदैन। खुला, इमानदार र सम्मानजनक संवादबाट मात्रै आपसी विश्वास निर्माण हुने र त्यसले दिगो समाधानको आधार तयार गर्ने उनको भनाइ छ।

राईले सरकार र आन्दोलनरत पक्षबीच भएको १३ बुँदे सहमतिले समेत केही गम्भीर प्रश्न उठाएको बताएका छन्। उनले उक्त सहमतिका विषयमा समेत स्पष्टता आवश्यक रहेको बताए।