काठमाडौं। राष्ट्रिय प्रजातन्त्र पार्टी (राप्रपा) की सांसद खुश्बु ओलीले प्रधानमन्त्री वालेन्द्र (बालेन) शाहले नेपालले समेत भारतको भूमि मिचेको भन्ने दिएको अभिव्यक्ति सच्याउन माग गरेकी छन्।

उनले उक्त अभिव्यक्ति संसद्को अभिलेखबाट हटाउनसमेत आग्रह गरेकी छन्।

शुक्रबार प्रतिनिधिसभाको बैठकमा बोल्दै ओलीले सीमा तथा राष्ट्रियतासँग जोडिएको संवेदनशील विषयमा प्रधानमन्त्रीबाट आएको अभिव्यक्ति त्रुटिपूर्ण रहेको बताइन्। उनले सत्तापक्षका सांसदहरूलाई प्रधानमन्त्रीसँग छलफल गरी उक्त अभिव्यक्ति सच्याउन पहल गर्न आग्रह गरिन्।

ओलीले आफ्नो विरोधको मुख्य विषय प्रधानमन्त्रीको सो अभिव्यक्ति रहेको भन्दै त्यसलाई सच्याएपछि आफूहरूको विरोध अन्त्य हुने संकेत गरिन्।

बैठकमा उनले १६ राजदूत पदका लागि २७ सयभन्दा बढी विज्ञले आवेदन दिएको विषय पनि उठाइन्। राजदूत नियुक्तिको प्रक्रिया तथा उम्मेदवार मूल्याङ्कनका आधार पारदर्शी बनाउन सरकारसँग उनले माग गरिन्।

सरकारले विगत ३५ वर्षमा के भयो भन्ने प्रश्न बारम्बार उठाउने गरेकोप्रति पनि ओलीले टिप्पणी गरिन्।

‘३५ वर्ष उहाँहरूले के गर्नुभयो भनेर अब नसोध्नुस्, ३५ वर्षमा उहाँहरूले नगरेको काम अब तपाईंहरूले गरेर देखाउनुस्,’ उनले भनिन्।

ओलीले स्वास्थ्य क्षेत्रमा देखिएका समस्याप्रति पनि सरकारको ध्यानाकर्षण गराइन्। वीर अस्पतालको आईसीयूमा उपचाररत इन्टर्न चिकित्सक डिल्ली हरिजनको स्वास्थ्य अवस्था गम्भीर रहेको भन्दै उनले उपचारमा आवश्यक ध्यान दिन आग्रह गरिन्। माइतीघरमा आन्दोलनरत चिकित्सकका माग सम्बोधन गर्न पनि उनले सरकारसँग आग्रह गरिन्।

चिकित्सक तथा स्वास्थ्यकर्मीका लागि समान कामको समान तलबको व्यवस्था गर्नुपर्ने र श्रम ऐनअनुसार कार्यघण्टा लागू गर्नुपर्ने उनको माग छ।

यसैगरी, मिटरब्याज पीडित तथा प्रहरीबाट ठगिएको दाबी गर्ने व्यक्तिहरूका समस्या समाधानका लागि पनि सरकारले पहल गर्नुपर्ने ओलीले बताइन्।

पछिल्लो समय बजारमा देखिएको ग्यास अभावको विषयसमेत उनले संसद्मा उठाइन्। ग्यासको विकल्पका रूपमा विद्युतीय चुलोको प्रयोग बढाउन त्यसमा लाग्ने भन्सार हटाउन तथा विद्युत्मा भ्याट छुट दिने व्यवस्था गर्न उनले सरकारलाई सुझाव दिइन्।

राष्ट्रियता, राजदूत नियुक्ति, स्वास्थ्यकर्मीका समस्या, मिटरब्याज पीडित तथा ग्यास अभावलगायत विषयमा सरकार गम्भीर बन्नुपर्ने उनको माग थियो।