एजेन्सी। इन्डोनेसियाको पूर्वी क्षेत्रमा पर्ने फ्लोरेस द्वीप नजिकै शनिबार बिहान ७.७ म्याग्निच्युडको शक्तिशाली भूकम्प गएको छ।

भूकम्पका कारण माउमेरे क्षेत्र र आसपासका तटीय बस्तीमा जनधनको क्षति भएको छ।

अमेरिकी भूगर्भ सर्वेक्षण (यूएसजीएस)का अनुसार स्थानीय समयअनुसार शनिबार बिहान ५ बजेर ५८ मिनेटमा भूकम्प गएको हो। प्रारम्भिक विवरणअनुसार भूकम्पमा परी कम्तीमा दुई जनाको मृत्यु भएको पुष्टि भएको छ भने एक जना घाइते भएका छन्।

इन्डोनेसियाको राष्ट्रिय विपद् व्यवस्थापन एजेन्सीका अनुसार माउमेरे बन्दरगाह क्षेत्रमा एक पुरुष र एक महिलाको मृत्यु भएको हो। भूकम्पबाट घाइते भएका एक जनाको उपचार भइरहेको जनाइएको छ।

भूकम्पको केन्द्रविन्दु पूर्वी नुसा तेङ्गारा प्रान्तको एन्दे सहरबाट करिब ६८ किलोमिटर उत्तर–पश्चिमतर्फ रहेको थियो। जमिनको सतहबाट करिब १० किलोमिटर गहिराइमा भूकम्पको केन्द्र रहेको बताइएको छ।

मुख्य भूकम्पपछि छोटो समयमै शक्तिशाली पराकम्पहरू समेत आएका थिए। प्रारम्भिक भूकम्प गएको करिब आधा घण्टाभित्र ५.९, ५.६ र ६.१ म्याग्निच्युडका तीनवटा पराकम्प महसुस गरिएको जनाइएको छ। लगातारका पराकम्पका कारण स्थानीय बासिन्दामा थप त्रास फैलिएको छ।

भूकम्पका कारण माउमेरे क्षेत्र तथा बन्दरगाह आसपासका थुप्रै घर र अन्य भौतिक संरचनामा क्षति पुगेको स्थानीय सञ्चारमाध्यमहरूले जनाएका छन्। क्षतिको पूर्ण विवरण भने संकलन भइरहेको छ। उद्धार तथा राहतका लागि स्थानीय अधिकारीहरूले प्रभावित क्षेत्रको अवस्था मूल्यांकन गरिरहेका छन्।

फ्लोरेस क्षेत्र इन्डोनेसियाको भूकम्पीय दृष्टिले अत्यन्त संवेदनशील क्षेत्रमध्ये एक हो। यस क्षेत्रमा विगतमा पनि शक्तिशाली भूकम्प र त्यसबाट उत्पन्न सुनामीले ठूलो क्षति पुर्‍याएको थियो।

सन् १९९२ मा फ्लोरेस क्षेत्रमा ७.७ म्याग्निच्युडको शक्तिशाली भूकम्प गएको थियो। उक्त भूकम्पपछि आएको विनाशकारी सुनामीका कारण ठूलो जनधनको क्षति भएको थियो। त्यस घटनाका कारण पछिल्लो भूकम्पपछि पनि स्थानीय प्रशासनले तटीय क्षेत्रमा विशेष सतर्कता अपनाएको हो।

भूकम्पपछि इन्डोनेसियाको मौसम तथा भूगर्भ एजेन्सीले प्रभावित तटीय क्षेत्रमा सुनामीको चेतावनी जारी गरेको थियो। एजेन्सीले सर्वसाधारणलाई नदी किनार तथा समुद्र तटबाट टाढा रहन र सम्भावित जोखिमबाट जोगिन उच्च भूभागतर्फ जान आग्रह गरेको थियो।

भूकम्पको केन्द्र समुद्रनजिक र तुलनात्मक रूपमा कम गहिराइमा रहेकाले तटीय क्षेत्रमा सुनामीको जोखिम बढेको अधिकारीहरूले बताएका थिए। सम्भावित थप पराकम्प र समुद्री छालको जोखिमलाई ध्यानमा राख्दै स्थानीय बासिन्दालाई सतर्क रहन आग्रह गरिएको छ।

प्रभावित क्षेत्रमा उद्धार, क्षतिको मूल्यांकन तथा सम्भावित थप जोखिमबारे निगरानी जारी रहेको इन्डोनेसियाली अधिकारीहरूले बताएका छन्।