काठमाडौं। सरकारसँगको वार्ता सकारात्मक बनेपछि म्यानपावर व्यवसायीले कार्यालय बन्द गरेर गर्दै आएको आन्दोलन फिर्ता लिएका छन्। आन्दोलन फिर्ता भएसँगै व्यवसायीहरू वैदेशिक रोजगारीमा जाने श्रमिकको प्रक्रिया अघि बढाउन सहमत भएका छन्।

वैदेशिक रोजगार व्यवसायी संघका सल्लाहकार तथा पदाधिकारी र युवा, श्रम तथा रोजगार मन्त्रालयका मन्त्री तथा सचिवबीच सोमबार बिहान भएको वार्तामा व्यवसायीका माग सम्बोधन गर्न सरकार सकारात्मक देखिएपछि आन्दोलन स्थगित गरिएको हो।

संघले यसअघि विभिन्न १५ बुँदे माग राख्दै आन्दोलन घोषणा गरेको थियो। वार्ताका क्रममा सरकारले ती मागमध्ये आवश्यक प्रक्रिया पूरा गर्नुपर्ने विषयलाई समेत समेटेर अधिकतम ३० देखि ४५ दिनभित्र सम्बोधन गर्ने प्रतिबद्धता जनाएको व्यवसायीहरूले बताएका छन्।

संघका अध्यक्ष डिकबहादुर खत्रीले सरकारसँगको वार्ता सकारात्मक भएकाले श्रमिकलाई विदेश पठाउने काम पुनः अघि बढाउने सहमति भएको बताए।

उनका अनुसार सेवा शुल्कको व्यवस्थापन, वैदेशिक रोजगारसम्बन्धी ऐन संशोधन तथा व्यवसायीका अन्य मागका विषयमा सरकारसँग विस्तृत छलफल भएको छ।

‘हाम्रा १५ बुँदे माग सम्बोधन गर्ने सरकारले सहमति जनाएको छ। ती माग पूरा गर्न कानुनी तथा प्रशासनिक प्रक्रिया पूरा गर्नुपर्ने भएकाले केही समय लाग्ने देखिएको छ,’ खत्रीले भने।

उनले पछिल्ला चरणमा भएका छलफलमा सेवा शुल्क, ऐन संशोधनको प्रक्रिया तथा आवश्यकताअनुसार आन्दोलनका कार्यक्रम परिवर्तन गर्ने विषयमा समेत सहमति बनेको जानकारी दिए।

यसैबीच युवा, श्रम तथा रोजगार मन्त्रालयले पनि संघले घोषणा गरेका आन्दोलनका कार्यक्रम फिर्ता भएको जनाएको छ। मन्त्रालयले व्यवसायीले उठाएका माग सम्बोधन गर्न आवश्यक पहल र अधिकतम प्रयास गर्ने बताएको छ।