एजेन्सी। पूर्वी इन्डोनेसियाको फ्लोरेस टापुमा शनिबार गएको शक्तिशाली भूकम्पपछि करिब १२ हजार ८ सय मानिस विस्थापित भएका छन्।

भूकम्पका कारण घर तथा सार्वजनिक संरचनामा क्षति पुगेपछि प्रभावितहरू विद्यालय, प्रहरी चौकी र सरकारी कार्यालयमा आश्रय लिएर बसिरहेका छन्।

७.७ म्याग्निच्युडको भूकम्पमा परी हालसम्म ५३ जनाको मृत्यु भएको र एक सयभन्दा बढी घाइते भएको उद्धार अधिकारीहरूले बताएका छन्। बेपत्ता भएको औपचारिक सूचना नआए पनि सम्भावित प्रभावित क्षेत्रमा खोज तथा उद्धार अभियान जारी छ।

इन्डोनेसियाको राष्ट्रिय विपद् व्यवस्थापन निकायका अनुसार सोमबार बिहानसम्म फ्लोरेसका विभिन्न क्षेत्रमा घर फर्कन नसक्ने विस्थापितको संख्या १२ हजार ८ सय पुगेको हो। लगातार परकम्प गइरहेकाले धेरै मानिस दोस्रो रात पनि घरबाहिरै बिताउन बाध्य भएका छन्।

भूकम्पको केन्द्रनजिकै रहेको नागेको क्षेत्रमा स्थानीयले त्रिपाल र खम्बाको सहायताले अस्थायी टहरा बनाएर रात कटाइरहेका छन्। स्थानीय बासिन्दाका अनुसार कतिपय घर पूर्णरूपमा भत्किएका छन् भने बाँकी घरमा समेत चिरा परेकाले बस्न जोखिमपूर्ण बनेको छ।

भूकम्पपीडितले पानी, कपडा र अन्य आवश्यक सामग्री लिन मात्र घर जाने र त्यसपछि अस्थायी शिविरमा फर्किने गरेका छन्। राहत वितरणमा ढिलाइ भएको भन्दै उनीहरूले सरकारसँग थप सहयोग मागेका छन्।

राष्ट्रिय विपद् व्यवस्थापन निकायका अनुसार भूकम्पबाट कम्तीमा ९१४ घरमा गम्भीर क्षति पुगेको छ। सयौँ घरमा सामान्य क्षति पुगेको छ भने विद्यालय, स्वास्थ्य संस्था र सरकारी कार्यालयसहित दर्जनौँ सार्वजनिक भवन प्रभावित भएका छन्।

भूकम्पका कारण बालबालिकाको पढाइसमेत प्रभावित भएको छ। सेभ द चिल्ड्रेनका अनुसार आठ हजारभन्दा बढी बालबालिका सुरक्षा जोखिम र शिक्षामा अवरोधको अवस्थामा छन्।

इन्डोनेसियाली वायुसेनाले दुई हर्क्युलस विमान र एउटा बोइङमार्फत करिब १३ टन आपत्कालीन राहत सामग्री प्रभावित क्षेत्रमा पुर्‍याएको जनाएको छ। दुर्गम क्षेत्रमा रहेका पीडितसम्म सामग्री पुर्‍याउन हेलिकप्टरसमेत परिचालन गरिएको छ।

राहत सामग्रीमा खाद्यान्न, खानेपानी, कपडा र आपत्कालीन उपचारका सामग्री छन्। सेनाले प्रमुख वितरण केन्द्रमा राहत व्यवस्थापनका लागि कर्मचारी खटाएको छ। यद्यपि प्रभावित बासिन्दाले अझै पर्याप्त राहत नपुगेको गुनासो गरिरहेका छन्।

उद्धार टोलीले स्थल र हवाई दुवै माध्यमबाट खोजी गरिरहेको अधिकारीहरूले बताएका छन्। बेपत्ता भएको सूचना नआए पनि भूकम्पबाट प्रभावित हुनसक्ने क्षेत्रमा खोजी जारी राखिएको छ।

फ्लोरेसका बासिन्दाका लागि सन् १९९२ को ७.७ म्याग्निच्युडको भूकम्पको त्रास अझै ताजा छ। त्यसबेला भूकम्पपछि आएको सुनामीमा करिब २ हजार ५ सय मानिसको मृत्यु भएको थियो।

इन्डोनेसिया प्रशान्त महासागर वरिपरि फैलिएको ‘रिङ अफ फायर’ क्षेत्रमा पर्ने भएकाले त्यहाँ भूकम्प तथा ज्वालामुखी गतिविधि भइरहन्छन्।

यसअघि सन् २००४ मा सुमात्राको तटमा गएको ९.१ म्याग्निच्युडको भूकम्पपछि आएको विनाशकारी सुनामीमा विश्वभर करिब २ लाख २० हजार मानिसको मृत्यु भएको थियो।

इन्डोनेसियामा मात्रै करिब १ लाख ७० हजार मानिसले ज्यान गुमाएका थिए। उक्त घटना आधुनिक इतिहासकै सबैभन्दा विनाशकारी प्राकृतिक विपत्तिमध्ये एक मानिन्छ।