मंगलबार बिहान करिब ७ बजे काठमाडौंबाट वीरगञ्जतर्फ जाँदै गरेको प्रदेश ३–०१–००२ झ ५१८३ नम्बरको स्कार्पियो जुरिखेतमा अनियन्त्रित भएर सडकबाट करिब ५०–६० मिटर तल खोल्सामा खसेको जिल्ला प्रहरी कार्यालय मकवानपुरले जनाएको छ।

दुर्घटनामा मुख्य न्यायाधीश डाँगीसहित दुई महिला र चार पुरुष घाइते भएका छन्। घटनालगत्तै प्रहरीले उद्धार गरी उनीहरूलाई उपचारका लागि भीमफेदी अस्पताल पुर्‍याएको थियो।

प्रहरीका अनुसार एक महिलाको अवस्था गम्भीर छ भने अन्य पाँच घाइतेको अवस्था मध्यम रहेको छ। उनीहरूलाई थप उपचारका लागि सुविधासम्पन्न अस्पताल लैजाने तयारी भइरहेको छ।

दुर्घटनाको जानकारी पाएपछि इलाका प्रहरी कार्यालय भीमफेदीबाट ट्राफिक प्रहरीसहित सात जनाको टोली घटनास्थल पुगेको थियो। जिल्ला प्रहरी कार्यालय मकवानपुरबाट प्रहरी उपरीक्षक श्यामबहादुर खत्रीको नेतृत्वमा थप टोलीसमेत घटनास्थल पुगेको प्रहरीले जनाएको छ।

दुर्घटनामा परेको स्कार्पियो घटनास्थलमै रहेको भए पनि सडकमा सवारी आवागमन भने सुचारु रहेको प्रहरीले जनाएको छ।