काठमाडौं। परराष्ट्रमन्त्री शिशिर खनालको जवाफप्रति असन्तुष्टि जनाउँदै राष्ट्रिय स्वतन्त्र पार्टीकी सांसद आशिका तामाङ प्रतिनिधिसभा बैठक छाडेर हिँडेकी छन्।

प्रतिनिधिसभाको बैठकमा परराष्ट्रमन्त्री खनालले जवाफ दिइरहेका बेला सांसद तामाङले उठेर थप प्रश्न गर्न पाउनुपर्ने माग गरेकी थिइन्। तर, सभामुखले उनलाई बोल्न समय नदिएपछि उनले आफूले प्रश्न राख्न पाउनुपर्ने अडान लिइन्।

सभामुखले ‘मैले बोल्न समय दिएको छैन, बस्नुस्’ भन्दै तामाङलाई बस्न आग्रह गरेका थिए। तर, उनले आफ्नो अडान कायमै राखेपछि सभामुखले उनलाई सभाको मर्यादामा रहन निर्देशन दिएका थिए।

सभामुखको निर्देशनपछि पनि असन्तुष्ट देखिएकी सांसद तामाङले झोला बोकेर आक्रोशित हुँदै प्रतिनिधिसभा बैठकबाट बाहिरिएकी हुन्।

सांसद तामाङले कम्बोडियामा ३७ दिनअघि निधन भएका धादिङका सन्तोष राईको शव नेपाल ल्याउने विषयमा सरकारको जवाफ माग्दै आएकी थिइन्। यस विषयमा मंगलबार सभामुखले सरकारलाई रुलिङ गरेपछि परराष्ट्रमन्त्री खनालले आजको बैठकमा जवाफ दिएका थिए।

तर, मन्त्री खनालले दिएको जवाफमा चित्त नबुझेपछि सांसद तामाङले थप प्रश्न गर्न पाउनुपर्ने माग गरेकी थिइन्। उनलाई बोल्न समय नदिएपछि विवाद बढेको हो।