काठमाडौं। सहकारी तथा लघुवित्तपीडितले आफ्ना समस्या समाधानका लागि संयुक्त राष्ट्रसंघका महासचिव एन्टोनियो गुटेरेसको ध्यानाकर्षण गराएका छन्।

पाँच दिनदेखि पुल्चोकस्थित राष्ट्रिय मानव अधिकार आयोगको प्राङ्गणमा धर्ना दिइरहेका पीडितहरूले प्रधानमन्त्री बालेन्द्र शाह नेतृत्वको सरकारले आफ्ना मागप्रति बेवास्ता गरेको भन्दै संयुक्त राष्ट्रसंघलाई गुहारेका हुन्।

नागरिक बचाऔँ महाअभियानको नेतृत्वमा आन्दोलन गरिरहेका पीडितहरूले धर्नास्थलमा विभिन्न सन्देश लेखिएका प्लेकार्ड प्रदर्शन गरेका छन्। ‘बालेनले हामीलाई सुनेनन्, एन्टोनियो गुटेरेस तिमीले हाम्रो दुःख–पीडा सुनिदेऊ’ र ‘हाम्रो घर छैन, परिवार छैन, नेपालले देखेन, संयुक्त राष्ट्रसंघले देखोस् हाम्रो पीडा’ जस्ता नारासहित उनीहरूले अन्तर्राष्ट्रिय समुदायको ध्यानाकर्षण गराएका छन्।

पीडितहरूले यसअघि तत्कालीन सरकारसँग २०८२ माघमा भएका सहमति कार्यान्वयन गर्न माग गर्दै साउन २९ गते मानव अधिकार आयोगमा ज्ञापनपत्र बुझाएका थिए। त्यसपछि उनीहरूले आयोगको कार्यालय परिसरमा धर्ना सुरु गरेका हुन्।

सहकारी तथा लघुवित्तमा बचत गरेको रकम फिर्ता नपाएको र आफूहरूको समस्या समाधानका लागि राज्यले प्रभावकारी पहल नगरेको उनीहरूको गुनासो छ।

माग सम्बोधन नभएसम्म आन्दोलन जारी राख्ने उनीहरूले बताएका छन्।