काठमाडौं । प्रतिनिधिसभाको बैठक आगामी भदौ ३ गते बुधबार दिउँसो १ बजेसम्मका लागि स्थगित भएको छ।

सोमबार बसेको बैठकमा विभिन्न मन्त्रालयसँग सम्बन्धित प्रश्नोत्तर, वार्षिक प्रतिवेदन पेस तथा विधेयकमाथिको छलफललगायतका कार्यसूची पूरा भएपछि सभामुख डोलप्रसाद अर्यालले बैठक स्थगित गरेका हुन्।

बैठकमा चार मन्त्रीले सांसदहरूले मौखिक रूपमा राखेका प्रश्नको जवाफ दिएका थिए। परराष्ट्रमन्त्री शिशिर खनाल, ऊर्जा, जलस्रोत तथा सिँचाइमन्त्री विराजभक्त श्रेष्ठ, संस्कृति, पर्यटन तथा नागरिक उड्डयनमन्त्री खड्क पौडेल र कृषि, वन तथा पर्यावरणमन्त्री गीता चौधरीले आ–आफ्ना मन्त्रालयसँग सम्बन्धित विषयमा सांसदका जिज्ञासाको जवाफ दिएका थिए।

त्यसैगरी, प्रधानमन्त्री बालेन्द्र शाहको तर्फबाट कानुन, न्याय तथा संसदीय मामिलामन्त्री सोविता गौतमले थारु आयोगको सातौँ वार्षिक प्रतिवेदन प्रस्तुत गरेकी थिइन्। प्रतिवेदनमा २०८१ साउनदेखि २०८२ असारसम्म आयोगले गरेका काम तथा गतिविधिको विवरण समेटिएको छ।

बैठकले परराष्ट्रमन्त्री शिशिर खनालले प्रस्तुत गरेको ‘राहदानी (पहिलो संशोधन) विधेयक, २०८३ माथि विचार गरियोस्’ भन्ने प्रस्तावलाई बहुमतले स्वीकृत गरेको छ। प्रस्ताव स्वीकृत भएसँगै विधेयकको सैद्धान्तिक छलफल अघि बढाउने बाटो खुलेको छ।

प्रतिनिधिसभाको अर्को बैठक भदौ ३ गते बुधबार दिउँसो १ बजे बस्नेछ।