काठमाडौं । अस्ट्रेलियाको नर्दन टेरिटोरीमा आयोजना हुने टप एन्ड टी-२० सिरिजका लागि भिक्टोरिया सीए-११ ले बलियो टोली घोषणा गरेको छ। टोलीमा बिग ब्यास लिग खेलिसकेका तथा अस्ट्रेलियाबाट टेस्ट र एकदिवसीय क्रिकेट खेलेका खेलाडीसमेत समेटिएका छन्।

विल सदरल्यान्डको कप्तानीमा रहेको भिक्टोरियाले सिरिजमा नेपालको ए टोलीसँग पनि प्रतिस्पर्धा गर्नेछ। नेपाल र भिक्टोरिया सीए–११ बीच अगस्ट २९ मा खेल हुनेछ।

सदरल्यान्ड अस्ट्रेलियाका लागि एकदिवसीय खेलिसकेका अलराउन्डर हुन्। उनी बिग ब्यास लिगमा मेलबर्न रेनेगेड्सको कप्तानीसमेत गर्दै आएका छन्।

यस्तै, टोलीमा अस्ट्रेलियाका लागि टेस्ट क्रिकेट खेलिसकेका अफस्पिनर टोड मर्फी पनि छन्। मर्फी भिक्टोरियाको बलिङ आक्रमणका प्रमुख खेलाडीमध्ये एक हुन्।

भिक्टोरियाको टोलीमा बिग ब्यास लिगका चर्चित खेलाडी साम हार्पर, ह्यारी डिक्सन, टम रोजर्स, क्यालम स्टो र क्याम्पबेल केलावेको पनि उपस्थिति छ। उनीहरूको उपस्थितिले नेपालविरुद्धको खेललाई थप प्रतिस्पर्धात्मक बनाउने देखिन्छ।

भिक्टोरिया सीए-११ : विल सदरल्यान्ड (कप्तान), माइकल आर्चर, अस्टिन एन्जेलजार्क, लियाम ब्ल्याकफोर्ड, ह्यारी डिक्सन, साम इलियट, साम हार्पर, ह्यारी होक्स्ट्रा, क्याम्पबेल केलावे, ब्लेक म्याकडोनाल्ड, टोड मर्फी, टम रोजर्स, आर्यन शर्मा, क्यालम स्टो र ब्रोडी सिमोन्स।