काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले बुधबार पार्टीका सांसद र मन्त्रीहरूलाई बोलाएर छलफल गरेका छन्। तर पार्टी संसदीय दलका नेता तथा प्रधानमन्त्री वालेन्द्र (बालेन) शाह भने बैठकमा सहभागी भएनन्।

लामिछानेले पार्टीका सांसद तथा सरकारमा रहेका मन्त्रीहरूलाई बोलाएपछि उक्त बैठकलाई लिएर रास्वपाभित्रको शक्ति सम्बन्ध र प्रधानमन्त्री शाह तथा सभापति लामिछानेबीचको सम्बन्धबारे विभिन्न चर्चा हुन थालेको छ।

रास्वपाको संसदीय दलको बैठक बोलाउने अधिकार संसदीय दलका नेता प्रधानमन्त्री शाहसँग रहने भए पनि लामिछानेले सांसद र मन्त्रीहरूलाई बोलाएर छलफल गरेपछि बैठकको वैधानिकता र प्रकृतिबारे प्रश्न उठेको हो। प्रधानमन्त्री शाह बैठकमा सहभागी नभएपछि उनीहरूबीच असन्तुष्टि बढेको अनुमानसमेत गरिएको छ।

तर सभापति लामिछानेले भने बैठकलाई लिएर भइरहेका चर्चाको खण्डन गरेका छन्। उनले बुधबारको छलफल संसदीय दलको औपचारिक बैठक नभएको स्पष्ट पारे।

सञ्चारकर्मीसँग कुरा गर्दै लामिछाप्रधानमन्त्रीज्यू कवि भएकाले कवि भावना पोखियो -रविनेले भने, ‘संसदीय दलको बैठक भए त प्रधानमन्त्रीज्यू भइहाल्नु हुन्थ्यो। तर आज चाहिँ छलफल मात्र बोलाइएको हो।’

लामिछानेले प्रधानमन्त्री शाहसँग आफ्नो सम्बन्ध बिग्रिएको भन्ने चर्चासमेत अस्वीकार गरे। पछिल्लो समय आफू र प्रधानमन्त्री शाहबीच मतभेद बढेको भन्दै सार्वजनिक रूपमा भइरहेका चर्चाप्रति उनले व्यङ्ग्यात्मक शैलीमा प्रतिक्रिया दिए।

‘दुईजनाबीच झगडा पर्‍यो भनेर लेख्नुहुन्छ, हामीलाई रमाइलो लाग्छ। तपाईंहरूको समाचारले हामीलाई अझ नजिक ल्याइरहेको छ। त्यसैले समाचार लेख्न नरोक्नुहोला,’ उनले भने।

प्रधानमन्त्री शाहले सामाजिक सञ्जालमा आफू ‘एक्लै लडिरहेको’ आशयको स्टाटस लेखेको विषयमा समेत लामिछानेलाई प्रश्न गरिएको थियो। त्यसको जवाफमा उनले शाहको अभिव्यक्तिलाई राजनीतिक असन्तुष्टिका रूपमा व्याख्या गर्न नहुने बताए।

उनले प्रधानमन्त्री शाह कवि तथा कलाकारसमेत भएकाले उनका हरेक अभिव्यक्तिको राजनीतिक अर्थ खोज्न आवश्यक नरहेको टिप्पणी गरे।

‘प्रधानमन्त्रीज्यू कवि र कलाकार पनि हो। यत्रो भिडमा पनि म एक्लो महसुस गर्न सक्दिनँ र हरेक शब्दको राजनीतिक अर्थ खोज्न हुँदैन,’ लामिछानेले भने, ‘यहाँ पार्टी सिंगै उभिएको छ, कहाँ एक्लो हुनुहुन्छ ?’