काठमाडाैं। रास्वपा सांसद आशिका तामाङ फेरि आक्रोशित बनेकी छन्। उपत्यका नगरपालिका महासंघको बैठकमा नगरपालिकाका प्रमुखहरूसँग विवाद भएपछि उनी आज पनि झोला बोकेर बैठकबाट निस्किएकी हुन्।

उपत्यकाको फोहोर व्यवस्थापनको सन्दर्भमा नगरपालिका महासंघले सञ्चारमन्त्री विक्रम तिमिल्सिनाको उपस्थितिमा बैठक आयोजना गरेको थियो। उक्त बैठकमा आशिका आक्रोशित बनेकी थिइन्। त्यसक्रममा उनी ‘हामी बञ्चरेडाँडामा फोहोर लैजान दिँदैनौँ’ भन्दै मेयरहरूसँग विवादमा उत्रिएकी थिइन्।

ललितपुरका मेयर चिरीबाबु महर्जन पनि बैठकमा उपस्थित थिए। आशिकाले अभद्र व्यवहार गरेको भन्दै उनी पनि आक्रोशित बने। ‘हामीलाई अपमान गर्न बोलाइएको हो?’ उनले त्यसक्रममा प्रश्न गरेका थिए।

त्यसपछि आशिका झोला बोकेर बैठकबाट बाहिरिइन्। उसो त उनका लागि बैठकबाट निस्किनु कुनै नौलो कुरा भने रहेन। यसअघि पनि उनी पटक-पटक प्रतिनिधिसभा बैठकबाट बाहिरिएकी थिइन्। यसका कारण उनको चौतर्फी आलोचना हुँदै आएको छ।