काठमाडौं । राष्ट्रिय सभा सदस्य तथा नेकपा एमालेका नेता सोमनाथ पोर्तेलले तीन वर्षीया बालिका गरिम्का चौधरीको बलात्कारपछि भएको हत्याले सिंगो नेपाली समाजलाई मर्माहत र चिन्तित बनाएको बताएका छन्।

राष्ट्रिय सभाको शून्य समयमा बोल्दै पोर्तेलले गरिमाको बलात्कारपछि भएको पाशविक हत्याले नेपाली समाज गहिरो पीडामा गुज्रिरहेको बताए। उनले बालिकाको न्यायका लागि आवाज उठाउनु र घटनामा संलग्न अभियुक्तलाई कठोर कानुनी सजाय दिलाउनु सबैको साझा दायित्व भएको उल्लेख गरे।

तर, घटनापछि सरकार तथा सुरक्षा निकायबाट प्रस्तुत गरिएको शैलीप्रति उनले गम्भीर आपत्ति जनाए। उनले यस घटनामा देखिएको व्यवहारलाई अमानवीय, असंवेदनशील र अत्यन्तै पीडादायी भएको टिप्पणी गरे।

पोर्तेलले एकातिर गृहमन्त्रीले सिंहदरबारमा भिडियो छायांकन गराएको र अर्कोतिर प्रहरीको निर्देशनमा समेत भिडियो छायांकन गरिएको दाबी गरे। ती दुवै भिडियोमा प्रस्तुत विषयवस्तु र संवाद अत्यन्तै कुरूप, हृदयविदारक र बीभत्स रहेको उनको भनाइ थियो।

बलात्कारपछि हत्या गरिएकी बालिकाका आमाबुबालाई ‘हामी खुसी छौँ’ भन्न लगाइएको तथा अर्कोतर्फ घटनाका अभियुक्तलाई छाती फुलाएर विजयघोष गरेजस्तो शैलीमा बयान दिन लगाइएको भन्दै उनले सरकारको कार्यशैलीमाथि प्रश्न उठाए।

उनले गम्भीर आपराधिक घटनालाई प्रचार वा तमासाको विषय बनाउन नहुने बताए। पीडित परिवारको पीडा र संवेदनशीलतालाई राज्यले सम्मान गर्नुपर्ने भन्दै पोर्तेलले नागरिकको दुःखलाई तमासामा नबदल्न सरकारलाई आग्रह गरे।

‘गरिमाको न्यायका लागि बोल्नु र अपराधीलाई कठोर सजायको व्यवस्था गर्नु हामी सबैको ध्येय हुनुपर्छ,’ पोर्तेलले भने, ‘नागरिकको पीडालाई तमासामा नबदल्न म सरकारलाई आग्रह गर्न चाहन्छु।’

उनले बालिकाको हत्या प्रकरणमा दोषीलाई कानुनअनुसार कडा कारबाही गर्नुपर्नेमा जोड दिँदै पीडित परिवारलाई न्याय दिलाउनु राज्यको पहिलो दायित्व भएको बताए। साथै, यस्ता संवेदनशील घटनामा सरकार र सुरक्षा निकायले सार्वजनिक रूपमा प्रस्तुत गर्ने सामग्री तथा अभिव्यक्तिमा थप जिम्मेवार र संवेदनशील बन्नुपर्ने धारणा राखे।

पोर्तेलले गरिमाको घटनालाई केवल एउटा आपराधिक घटना मात्र नभई राज्यको संवेदनशीलता, न्याय प्रणाली र पीडितप्रतिको व्यवहारको परीक्षाका रूपमा लिनुपर्ने बताए। बालिकामाथि भएको जघन्य अपराधले समाजलाई गम्भीर रूपमा झस्काएको भन्दै उनले यस्ता घटना दोहोरिन नदिन प्रभावकारी कानुनी कार्यान्वयन र सुरक्षा व्यवस्था आवश्यक रहेको बताए।

राष्ट्रिय सभाको शून्य समयमा उनले सरकारको ध्यान घटनाको निष्पक्ष अनुसन्धान, दोषीलाई कठोर सजाय र पीडित परिवारलाई न्याय दिलाउनेतर्फ केन्द्रित गर्न आग्रह गरे।