काठमाडौं। हाइटीको राजधानी पोर्ट-ओ-प्रिन्सको दक्षिणपूर्वी क्षेत्रमा पर्ने केन्स्कोफ नगरपालिकामा सशस्त्र गिरोहले गरेको आक्रमणमा कम्तीमा ४७ जनाको मृत्यु भएको छ।

आक्रमणमा २२ जना घाइते भएका छन्। संयुक्त राष्ट्रसङ्घले सार्वजनिक गरेको प्रारम्भिक विवरणअनुसार घटनामा ज्यान गुमाउने र घाइते हुनेको सङ्ख्या अझ बढ्न सक्ने जनाएको छ।

हाइटीस्थित संयुक्त राष्ट्रसङ्घीय एकीकृत कार्यालयका अनुसार आक्रमणपछि केन्स्कोफको सुरक्षा अवस्था थप गम्भीर बनेको छ। हाइटी सरकारले घटनालाई ‘जघन्य आक्रमण’ भन्दै निन्दा गरेको छ भने प्रभावित क्षेत्रमा सुरक्षा व्यवस्था कडा बनाउँदै सरकारी नियन्त्रण पुनःस्थापित गर्ने प्रतिबद्धता जनाएको छ।

प्रधानमन्त्री एलिक्स डिडियर फिल्स–एमेको कार्यालयले घटनामा ज्यान गुमाएकाप्रति श्रद्धाञ्जली तथा मृतक र घाइतेका परिवारप्रति समवेदना व्यक्त गरेको छ। सरकारले केन्स्कोफलाई त्याग्न नदिने भन्दै सरकारी अधिकार पुनःस्थापित गर्न सुरक्षा निकायलाई तत्काल परिचालन गरिएको जनाएको छ।

संयुक्त राष्ट्रसङ्घका अनुसार सन् २०२५ को सुरुआतका दुई महिनामै केन्स्कोफ क्षेत्रमा गिरोहले गरेका विभिन्न आक्रमणमा २६० भन्दा बढी मानिस मारिएका थिए। ती घटनाका क्रममा करिब २०० घर ध्वस्त वा जलेका थिए भने करिब ३ हजार मानिस विस्थापित भएका थिए।

त्यसयता पनि केन्स्कोफ क्षेत्रमा अपहरण, आगजनी र गाईवस्तु चोरीलगायतका १० भन्दा बढी हिंसात्मक घटना भएको संयुक्त राष्ट्रसङ्घको विवरणमा उल्लेख छ।

हाइटीमा सशस्त्र गिरोहको प्रभाव पछिल्ला वर्षहरूमा निरन्तर बढ्दै गएको छ। पर्याप्त हतियार र स्रोतसाधनको अभावमा रहेको स्थानीय प्रहरीलाई अन्तर्राष्ट्रिय सहयोग प्राप्त भए पनि राजधानी पोर्ट–ओ–प्रिन्स आसपासका क्षेत्रमा गिरोहहरूले आफ्नो प्रभाव विस्तार गरिरहेका छन्।

लामो समयदेखि राजनीतिक, आर्थिक र सुरक्षा सङ्कट झेलिरहेको हाइटीमा पछिल्ला वर्षहरूमा हिंसाका घटना थप तीव्र बनेका छन्। हत्या, अपहरण, यौन हिंसा तथा बालबालिकालाई जबर्जस्ती गिरोहमा भर्ती गराउने घटनाले नागरिक सुरक्षामाथि गम्भीर चुनौती खडा गरेको छ।

अन्तर्राष्ट्रिय आप्रवासन सङ्गठनले जुनमा सार्वजनिक गरेको अनुमानअनुसार करिब १ करोड १० लाख जनसङ्ख्या रहेको हाइटीमा हिंसाका कारण झन्डै १५ लाख मानिस आन्तरिक रूपमा विस्थापित भएका छन्।

गिरोहको प्रभाव नियन्त्रण गर्दै स्थानीय प्रहरीलाई सहयोग गर्ने उद्देश्यले संयुक्त राष्ट्रसङ्घको समर्थनमा अन्तर्राष्ट्रिय सुरक्षा बल परिचालनको तयारी भइरहेका बेला केन्स्कोफमा भएको पछिल्लो आक्रमणले हाइटीको बिग्रँदो सुरक्षा अवस्थाप्रति अन्तर्राष्ट्रिय चिन्ता थप बढाएको छ।